خلیج اردو
عیدالاضحیٰ 2026 کی طویل تعطیلات کے پیش نظر متحدہ عرب امارات کے رہائشی ویزا فری اور آسان سفری سہولیات والے ممالک کا رخ کر رہے ہیں، جہاں کم وقت میں بہترین سیاحت ممکن ہو سکے۔
سفری ماہرین کے مطابق اس سال زیادہ تر افراد ایسے ممالک کو ترجیح دے رہے ہیں جہاں ویزا کے طویل اور پیچیدہ مراحل سے گزرنا نہ پڑے۔ یو اے ای میں 27 مئی سے 30 مئی تک سرکاری تعطیلات کے باعث شہریوں کو چھ سے نو دن تک سفر کا موقع مل سکتا ہے۔
ماہرین کے مطابق آرمینیا اس بار بھی سب سے مقبول منزل بن گیا ہے۔ خوبصورت پہاڑ، کیفے کلچر، کم خرچ سفر اور مختصر فلائٹ ٹائم نے اسے یو اے ای رہائشیوں کی پہلی پسند بنا دیا ہے۔ دارالحکومت یریوان صرف تین گھنٹے کی پرواز پر واقع ہے۔
جارجیا بھی یورپی طرز کے ماحول، خوبصورت گلیوں اور آسان داخلے کی سہولت کے باعث سیاحوں کو اپنی جانب متوجہ کر رہا ہے۔ تبلیسی اور قازبیگی جیسے مقامات مختصر تعطیلات کیلئے موزوں قرار دیے جا رہے ہیں۔
سیشلز کو بھی اس سال غیر معمولی توجہ حاصل ہوئی ہے۔ ماہرین کے مطابق یہ مالدیپ جیسا خوبصورت ساحلی تجربہ فراہم کرتا ہے جبکہ یو اے ای رہائشیوں کیلئے داخلہ نسبتاً آسان ہے۔
وسطی ایشیا میں ازبکستان کو نئی ابھرتی ہوئی سیاحتی منزل قرار دیا جا رہا ہے، جہاں تاشقند اور سمرقند کی تاریخی عمارتیں، بازار اور ثقافتی ماحول سیاحوں کو متوجہ کر رہے ہیں۔
دوسری جانب ماریشس بھی خاندانوں اور طویل تعطیلات گزارنے والوں کیلئے اہم انتخاب بن گیا ہے۔ خوبصورت ساحل، فرانسیسی کریول ثقافت اور قدرتی مناظر اسے منفرد بناتے ہیں۔
سفری ماہرین نے خبردار کیا ہے کہ اگرچہ ان ممالک کو ویزا فری یا ویزا آن ارائیول کہا جاتا ہے، تاہم مختلف پاسپورٹس اور یو اے ای رہائشی حیثیت کے مطابق قوانین مختلف ہوسکتے ہیں، اس لیے سفر سے قبل سرکاری ہدایات ضرور چیک کی جائیں۔
