امریکی ٹک ٹاکرز کی غلطی: ‘ٹو نائس’ سے ‘ٹونیس’ تک کا سفر، افریقہ فوبیا پر نئی بحث چھڑ گئی

خلیج اردو
دبئی: دو امریکی نوجوان ٹک ٹاکرز نے روم سے نائس (فرانس) کے بجائے ٹونیس (تیونس) کی فلائٹ لے کر نہ صرف غیر متوقع جغرافیائی سبق حاصل کیا بلکہ سوشل میڈیا پر ہنگامہ بھی برپا کر دیا۔

برٹنی ڈزیالو اور اس کی دوست نائس کے لیے ٹکٹ مانگتے ہوئے انجانے میں ٹونیس ایئر کی فلائٹ پر سوار ہو گئیں۔ پرواز کے دوران ایک مسافر کی بات سے حقیقت کھلی کہ جہاز تیونس جا رہا ہے۔ دروازے بند ہونے کے بعد قسمت نے انہیں شمالی افریقہ پہنچا دیا۔

ائرپورٹ پر حیرت اور مزاح کا امتزاج لیے یہ غلطی جلد ہی وائرل ہو گئی، جب ڈزیالو نے اپنی دوست کی تیونس کے فوارے کے ساتھ تصویر شیئر کرتے ہوئے لکھا: “NICE, COMMA, FRANCE”۔

تاہم سوشل میڈیا صارفین اور کئی صحافیوں نے اس پر تنقید کی کہ ایک عام جغرافیائی غلطی کو افریقہ سے خوف اور لاعلمی کی علامت بنا کر پیش کیا گیا۔ ٹک ٹاک کمنٹس میں لوگوں نے کہا: “بورڈنگ پاس نہیں پڑھا؟ گیٹ پر لکھا ’TUNIS‘ نظر نہیں آیا؟”

حادثاتی ہو یا دانستہ، ایک بات طے ہے کہ یہ دونوں اب کبھی نائس اور ٹونیس کو گڈمڈ نہیں کریں گی، اور شاید ان کا سفر سوچ کے نئے در وا بھی کرے۔