خلیج اردو
ابوظہبی: متحدہ عرب امارات نے مالیاتی تنازعات اور دیوالیہ پن کے معاملات کے حل کے لیے دیوالیہ پن عدالت (Bankruptcy Court) کے قیام کا اعلان کر دیا ہے۔ وزارتِ انصاف کے مطابق یہ عدالت ابوظہبی فیڈرل کورٹ آف فرسٹ انسٹینس میں قائم کی جائے گی، جو وفاقی فرمان قانون برائے مالیاتی تنظیم نو اور دیوالیہ پن کے تحت درخواستوں اور تنازعات کی سماعت کرے گی۔
وزیرِ انصاف اور فیڈرل جوڈیشری کونسل کے چیئرمین عبداللہ سلطان بن عواد النعیمی نے اس تاریخی فیصلے کا اعلان کیا۔ ان کا کہنا تھا کہ اس اقدام کا مقصد عدالتی ڈھانچے کو ترقی دینا، معیشت کی معاونت کرنا اور مالی بحران و دیوالیہ پن کے معاملات میں عدالتی نظام کی کارکردگی کو بہتر بنانا ہے۔
فیڈرل جوڈیشری کونسل کو اختیار دیا گیا ہے کہ وہ مرکزی عدالت کے تحت ملک کے کسی بھی امارات میں دیوالیہ پن عدالت کی شاخیں قائم کر سکتی ہے تاکہ مختلف درخواستوں اور تنازعات کی سماعت مؤثر طریقے سے کی جا سکے۔
فیصلے کی تفصیلات:
عدالت کے سربراہ ایک چیف جج ہوں گے جن کا رینک کم از کم اپیلیٹ جج کے مساوی ہوگا۔ اس کے علاوہ مالیاتی امور میں مہارت رکھنے والے کئی ججز بھی فیڈرل جوڈیشری کونسل کے ذریعے تعینات کیے جائیں گے۔
عدالت کے اندر ایک خصوصی دیوالیہ پن ڈویژن بھی قائم کیا جائے گا جو کم از کم اپیلیٹ جج کی سربراہی میں کام کرے گا۔ یہ ڈویژن درخواستیں وصول کرنے، اعتراضات اور شکايات کی سماعت، درخواستوں کی رجسٹریشن اور دیگر متعلقہ امور انجام دے گا۔
فیصلے میں عدالت سے منسلک انتظامی یونٹس اور ان کے دائرہ کار کا بھی تعین کیا گیا ہے تاکہ آپریشنل کارکردگی اور کرداروں کا انضمام یقینی بنایا جا سکے۔
عدالت کو یہ اختیار بھی حاصل ہوگا کہ وہ ماہرین اور مشیروں کی خدمات حاصل کرے جو قرض دار کے اثاثوں اور کاروباری امور کی نگرانی، احتیاطی اقدامات کی عمل درآمد، طریقہ کار کو تیز کرنے، قرض دہندگان سے ملاقات، اور قرض دار یا اس کے نمائندے سے قرضوں، اثاثوں اور آپریشنز کے حوالے سے سماعت جیسے امور انجام دیں۔
یہ اقدام مالی استحکام کو فروغ دینے، قانونی کارروائیوں کو موثر بنانے اور معاشی سرگرمیوں کے تسلسل کو انصاف کے تقاضوں کے ساتھ ہم آہنگ رکھنے کی جانب ایک اہم پیش رفت ہے، جو شفافیت اور کارکردگی کے اعلیٰ معیار کے مطابق ہوگی۔
