خلیج اردو
متحدہ عرب امارات کے بانی شیخ زاید بن سلطان النہیان کے امیرِ ابوظبی کا منصب سنبھالنے کے 60 سال مکمل ہونے پر اماراتی قیادت نے انہیں زبردست خراجِ عقیدت پیش کرتے ہوئے ان کے وژن، قیادت اور قومی خدمات کو سراہا۔
6 اگست 1966 کو شیخ زاید نے ابوظبی کی قیادت سنبھالی تھی، جسے متحدہ عرب امارات کی جدید تاریخ کا ایک اہم سنگِ میل قرار دیا جاتا ہے۔ بعد ازاں ان ہی کی قیادت میں 2 دسمبر 1971 کو متحدہ عرب امارات کا قیام عمل میں آیا۔
صدرِ یو اے ای شیخ محمد بن زاید النہیان نے سوشل میڈیا پلیٹ فارم ایکس پر اپنے پیغام میں کہا کہ آج بانیٔ امارات کے اقتدار سنبھالنے کی 60ویں سالگرہ ہے، جو ترقی اور اتحاد کے قومی سفر کا نقطۂ آغاز تھی۔
انہوں نے کہا کہ شیخ زاید کی قیادت اور وژن سے رہنمائی لیتے ہوئے متحدہ عرب امارات ایک ایسے پائیدار اور خوشحال مستقبل کی تعمیر جاری رکھے گا جس میں انسان کو ہمیشہ ترقی کا محور بنایا جائے گا۔
دبئی کے حکمران، نائب صدر اور وزیرِ اعظم شیخ محمد بن راشد آل مکتوم نے اپنے پیغام میں کہا کہ شیخ زاید صرف ایک رہنما یا سیاست دان نہیں بلکہ ایک عظیم فکر تھے۔
انہوں نے کہا کہ دنیا میں کچھ رہنما قومیں بناتے ہیں اور کچھ مفکر انسانوں کی تعمیر کرتے ہیں، جبکہ شیخ زاید نے دونوں کام انجام دیے۔ انہوں نے ایک مضبوط ریاست قائم کی، عوام کی تعمیر کی اور قوم اور وطن کے درمیان دائمی رشتہ استوار کیا۔
نائب صدر شیخ منصور بن زاید النہیان نے بھی بانیٔ امارات کو خراجِ عقیدت پیش کرتے ہوئے کہا کہ چھ دہائیاں قبل ایک ایسے رہنما نے ابوظبی کی قیادت سنبھالی جس کا یقین تھا کہ مستقبل عزم، محنت اور انسانوں میں سرمایہ کاری سے تعمیر ہوتا ہے۔ انہوں نے کہا کہ شیخ زاید کی میراث آنے والی نسلوں کے لیے بھی رہنمائی کا ذریعہ بنی رہے گی۔
صدرِ یو اے ای کے سفارتی مشیر ڈاکٹر انور قرقاش نے کہا کہ 6 اگست متحدہ عرب امارات کی تاریخ کا ایک فیصلہ کن دن ہے، جب شیخ زاید کی بصیرت اور عزم نے ایک ایسی ترقیاتی داستان کا آغاز کیا جو آج دنیا کے لیے ایک کامیاب مثال بن چکی ہے۔
اسی موقع پر زاید نیشنل میوزیم نے شیخ زاید کی قیادت سنبھالنے کے فوراً بعد عوام سے خطاب کی ایک نایاب تاریخی تصویر بھی جاری کی اور کہا کہ یہ لمحہ ان کے واضح وژن اور ان اصولوں کی عکاسی کرتا ہے جنہوں نے متحدہ عرب امارات کی ترقی اور خوشحالی کی بنیاد رکھی۔
