خلیج اردو
متحدہ عرب امارات کی قومی فضائی کمپنی اتحاد ایئرویز نے اعلان کیا ہے کہ وہ 8 اگست (ہفتہ) سے بحرین اور کویت کے لیے اپنی پروازیں دوبارہ بحال کر رہی ہے۔ یہ پروازیں ایران کی جانب سے حالیہ حملوں کے بعد تقریباً تین ہفتوں سے معطل تھیں۔
ایئرلائن کے فلائٹ اسٹیٹس کے مطابق فلائٹ EY643 بحرین انٹرنیشنل ایئرپورٹ جبکہ فلائٹ EY653 کویت انٹرنیشنل ایئرپورٹ کے لیے 8 اگست سے دوبارہ آپریشن شروع کریں گی۔
اتحاد ایئرویز نے اس سے قبل ان روٹس پر پروازوں کی منسوخی کی وجہ "آپریشنل وجوہات” بتائی تھی۔ گزشتہ چند ہفتوں کے دوران سعودی عرب کے شہر دمام سمیت خطے کے دیگر روٹس بھی متاثر ہوئے تھے۔
بحرین کے لیے پروازیں 16 جولائی سے معطل تھیں، جب ایک اتحاد ایئرویز کا طیارہ دورانِ پرواز واپس ابوظبی لوٹنے پر مجبور ہو گیا تھا، جس کے بعد بحرین سے ابوظبی کی واپسی کی پرواز بھی منسوخ کر دی گئی تھی۔
اسی عرصے کے دوران ایران کے حملوں کے باعث کویت کے لیے بھی پروازیں عارضی طور پر معطل کر دی گئی تھیں۔
