خلیج اردو
متحدہ عرب امارات کے شہری 12 اگست کی شب آسمان پر سال کے سب سے خوبصورت فلکی مظاہر میں سے ایک "پرسائیڈز میٹیور شاور” کا مشاہدہ کر سکیں گے۔ یہ شہاب ثاقب نہ صرف روشنی کی لکیریں بناتے ہیں بلکہ بعض اوقات "فائر بالز” یعنی انتہائی روشن شہاب ثاقب بھی دکھائی دیتے ہیں جو سیارہ زہرہ سے بھی زیادہ چمکدار ہوتے ہیں۔
پرسائیڈز میٹیور شاور ہر سال جولائی کے وسط سے اگست کے آخر تک جاری رہتا ہے، تاہم اس کا عروج 12 اور 13 اگست کی درمیانی شب ہوتا ہے۔ اس سال چاندنی رات کی موجودگی کے باعث ہلکے شہاب ثاقب کم دکھائی دیں گے لیکن فائر بالز واضح طور پر نظر آئیں گے۔
دبئی ایسٹرونومی گروپ کے مطابق بہترین مشاہدہ آدھی رات کے بعد سے طلوع آفتاب تک ممکن ہوگا، بشرطیکہ آپ کسی تاریک مقام پر ہوں جہاں شہر کی روشنیاں نہ ہوں۔ شہاب ثاقب دیکھنے کے لیے کسی دوربین یا دوربینِ نظر کی ضرورت نہیں، بس 20 سے 30 منٹ تک آنکھوں کو اندھیرے میں ایڈجسٹ کرنے دیں۔
12 اگست کی شب دبئی ایسٹرونومی گروپ جبل جیس پر 11 بجے شب سے 3 بجے صبح تک ایک خصوصی تقریب کا انعقاد بھی کرے گا جہاں ٹیلی اسکوپ کے ذریعے مشاہدہ، فلکیات پر گفتگو اور کہانیاں بھی شامل ہوں گی۔
یہ مظاہر اس وقت ہوتا ہے جب زمین "کومیٹ سوفٹ ٹٹل” کے پیچھے چھوڑے گئے ملبے کے راستے سے گزرتی ہے۔ یہ گرد و غبار اور برف کے ذرات زمین کے ماحول میں 59 کلومیٹر فی سیکنڈ کی رفتار سے داخل ہو کر جلتے ہیں اور روشنی کی لکیریں پیدا کرتے ہیں۔ اس شاور کا نام "پرسئیس” نامی جھرمٹ سے منسوب ہے جہاں سے شہاب ثاقب آتے محسوس ہوتے ہیں۔
کومیٹ سوفٹ ٹٹل ہر 133 سال بعد سورج کے گرد چکر لگاتا ہے اور آخری بار 1992 میں زمین کے قریب سے گزرا تھا۔ ماہرین فلکیات کے مطابق یہ کومیٹ اگلے کئی ہزار سالوں تک زمین کے لیے کوئی خطرہ نہیں بنے گا۔
دبئی ایسٹرونومی گروپ نے فوٹوگرافی کے شوقین افراد کے لیے چند تجاویز دی ہیں:
* ڈی ایس ایل آر یا میرر لیس کیمرا استعمال کریں تاکہ ISO، اپرچر اور شٹر سپیڈ پر مکمل کنٹرول حاصل ہو۔
* مستحکم تصویروں کے لیے مضبوط ٹرائی پاڈ کا استعمال کریں۔
* وائیڈ اینگل لینس آسمان کے زیادہ حصے کو کور کرنے میں مددگار ہوگا۔
* ریموٹ شٹر یا انٹرولومیٹر کے ساتھ اضافی بیٹریاں اور لینس ہیٹر ضرور رکھیں تاکہ نمی سے بچا جا سکے۔
* آٹو فوکس بند کر کے دستی طور پر کسی روشن ستارے یا انفینٹی پر فوکس کریں۔
* اپرچر f/2.8 یا اس سے کم رکھیں، 15-30 سیکنڈ کا ایکسپوژر سیٹ کریں اور ISO کو 1600 یا اس سے زیادہ رکھیں۔
UAE: Perseids meteor shower to peak on August 12; how to watch, photography tips.
