خلیج اردو
دبئی: متحدہ عرب امارات میں گرمی کا سب سے شدید دورانیہ "المرزم سیزن” کے آغاز کے ساتھ شروع ہو چکا ہے، جو جولائی 29 سے اگست 10 تک جاری رہے گا۔ معروف ماہر فلکیات ابراہیم الجروان کے مطابق، اس عرصے کے دوران درجہ حرارت 50 ڈگری سینٹی گریڈ سے تجاوز کر سکتا ہے۔
حال ہی میں متحدہ عرب امارات کے مختلف علاقوں میں اچانک بارش، ریت کے طوفان اور ژالہ باری کے واقعات پیش آئے، جس نے شدید گرمی میں شہریوں کو حیران کر دیا۔ ان علاقوں کے علاوہ دیگر حصوں میں درجہ حرارت میں مسلسل اضافہ دیکھنے میں آیا۔ نیشنل سینٹر آف میٹیرولوجی (NCM) کے مطابق، 31 جولائی بروز جمعرات درجہ حرارت 50.6 ڈگری سینٹی گریڈ تک پہنچ گیا۔
ابراہیم الجروان کا کہنا ہے کہ المرزم ستارے کے طلوع کے بعد گرم صحراؤں کی ہوائیں اپنی شدت کی انتہا کو پہنچتی ہیں، جس کے باعث اگست 10 تک گرمی کی شدت میں اضافہ ہوگا۔ عربی میں ان شدید گرم اور خشک ہواؤں کو ‘سموم’ کہا جاتا ہے۔ اس عرصے کو ‘وغرة القيظ’ بھی کہا جاتا ہے، جب علاقہ شدید خشک اور جھلسا دینے والی گرمی کی لپیٹ میں آ جاتا ہے۔
شہریوں کو سخت ہدایت کی گئی ہے کہ وہ دن کے اوقات میں غیر ضروری طور پر گھروں سے باہر نہ نکلیں اور دھوپ کے عروج کے وقت خود کو ٹھنڈی جگہوں تک محدود رکھیں۔
’ایام الکلب‘ – سال کے گرم ترین دن
المرزم کے دنوں کو ’ایام الکلب‘ (Days of the Dog) بھی کہا جاتا ہے، جو کہ قدیم رومیوں اور یونانیوں کے زمانے کی اصطلاح ہے۔ اس عرصے میں نہ صرف شدید گرمی اور خشکی کا سامنا ہوتا ہے بلکہ انسانی جسم میں سستی، کاہلی اور جانوروں میں کمزوری و ناتوانی بھی دیکھی جاتی ہے۔
ابراہیم الجروان کے مطابق عرب روایات میں کہا جاتا ہے: "جب المرزم طلوع ہوتا ہے تو گرمی اپنی انتہا کو پہنچتی ہے۔” المرزم کا طلوع سمندری سفر اور زراعت کے موسموں کا تعین کرنے کے لیے بھی استعمال کیا جاتا تھا۔ تاریخی طور پر، خلیج عرب کے موتی چننے والے غوطہ خور اس موسم کو گہرے پانیوں میں موتی نکالنے کا بہترین وقت سمجھتے تھے، جبکہ کاشتکار اس وقت کھجوروں کی کٹائی کے لیے موزوں موسم سمجھتے ہیں۔
