خلیج اردو
امریکی وزیر خزانہ اسکاٹ بیسنٹ نے کہا ہے کہ امریکا ایران پر "تاریخ کی سخت ترین پابندیاں” عائد کرے گا۔ ان کے مطابق معاشی دباؤ بڑھانے سے ایران کے خلاف کسی نئی بڑی فوجی کارروائی کی ضرورت کم ہوسکتی ہے۔
اسکاٹ بیسنٹ کا بیان امریکی صدر ڈونلڈ ٹرمپ کی جانب سے ایک روز قبل ایران کے خلاف "اقتصادی جنگ” کی دھمکی کے بعد سامنے آیا۔ ٹرمپ نے خبردار کیا تھا کہ جو بھی ملک ایران کو کسی بھی قسم کا سہارا فراہم کرے گا اسے معاشی نتائج کا سامنا کرنا پڑے گا۔
امریکی دھمکیوں کے بعد جمعرات کو عالمی مارکیٹ میں تیل کی قیمتیں تین ہفتوں سے زائد کی بلند ترین سطح پر پہنچ گئیں۔ امریکی اقدامات کا مقصد تقریباً چھ ماہ سے جاری جنگ کے خاتمے کے لیے ایران پر شدید مالی دباؤ ڈالنا ہے۔
اسکاٹ بیسنٹ نے سی این بی سی سے گفتگو میں کہا کہ اگر امریکا زیادہ سے زیادہ معاشی دباؤ استعمال کر رہا ہے تو اس کا مطلب یہ ہوسکتا ہے کہ بڑے پیمانے پر نئی فوجی کارروائی شروع نہیں کی جائے گی۔
امریکا اور ایران اپریل اور جون میں دو مرتبہ جنگ بندی کے معاہدوں کا اعلان کرچکے ہیں جن کا مقصد آبنائے ہرمز میں بحری جہازوں کی آزادانہ آمدورفت بحال کرنا اور تنازع ختم کرنے کی راہ ہموار کرنا تھا تاہم دونوں جنگ بندی معاہدے جلد ہی ناکام ہوگئے۔
دوسری جانب ایران کی وزارت خارجہ نے امریکی معاشی اور تجارتی پابندیوں کی شدید مذمت کرتے ہوئے انہیں "اقتصادی دہشت گردی” قرار دیا ہے۔ ایرانی حکام کا کہنا ہے کہ ان پابندیوں کا نشانہ عام ایرانی شہری بنیں گے اور یہ اقدامات انسانیت کے خلاف جرائم کے مترادف ہیں۔
