خلیج اردو
دبئی پولیس نے ڈرائیوروں کو اچانک لین تبدیل کرنے کے خطرات سے خبردار کرتے ہوئے کہا ہے کہ اس خلاف ورزی پر ایک ہزار درہم جرمانہ اور چار بلیک پوائنٹس عائد کیے جا سکتے ہیں۔ پولیس نے شہریوں پر زور دیا ہے کہ وہ خطرناک انداز میں گاڑی موڑنے سے گریز کریں اور ٹریفک قوانین کی پابندی کریں۔
پولیس کی جانب سے جاری ویڈیو میں ایک سفید کار اور ٹویوٹا وین کے درمیان حادثہ دکھایا گیا ہے۔ ویڈیو کے مطابق سڑک پر ٹریفک مختلف لینز میں تقسیم ہو رہی تھی کہ سفید کار کے ڈرائیور نے پہلے سے درست لین اختیار کرنے کے بجائے اچانک کئی لین عبور کرکے بائیں جانب جانے کی کوشش کی۔
اس دوران کار ساتھ چلنے والی ٹویوٹا وین کے راستے میں آ گئی اور دونوں گاڑیاں آپس میں ٹکرا گئیں۔ ٹکر کے نتیجے میں وین سڑک سے باہر گھاس والے حصے میں جا گری، جبکہ سفید کار آگے نکل گئی۔ دبئی پولیس نے ڈرائیوروں کو ہدایت کی ہے کہ لین تبدیل کرنے سے پہلے اطراف کی ٹریفک کا جائزہ لیں اور مناسب فاصلہ یقینی بنائیں۔
دوسری جانب 29 اکتوبر کو دبئی پولیس نے تھکاوٹ یا غنودگی کی حالت میں ڈرائیونگ کے خطرات سے بھی خبردار کیا تھا۔ پولیس کے مطابق ایمریٹس روڈ ای 611 پر دبئی فلائی اوور سے ابوظہبی کی جانب جانے والے راستے پر ایک ٹرک ڈرائیور کو دورانِ ڈرائیونگ نیند آ گئی، جس کے باعث ٹرک بے قابو ہو کر دھاتی حفاظتی رکاوٹ سے ٹکرا گیا۔
حادثے میں ڈرائیور معمولی زخمی ہوا اور اسے موقع پر طبی امداد فراہم کی گئی۔ دبئی پولیس کے شعبہ ٹریفک کے ڈائریکٹر بریگیڈیئر جمعہ سالم بن سویدان نے کہا کہ تھکاوٹ ڈرائیور کی توجہ، چوکنا رہنے کی صلاحیت اور اچانک صورتحال میں فوری ردعمل کو متاثر کرتی ہے۔
