
خلیج اردو
ابوظبی میں 250 سے زائد سیاحتی اور ثقافتی مقامات پر خصوصی افراد اور ان کے اہل خانہ کے لیے سہولتوں اور رسائی کا جائزہ لیا جائے گا، جس کا مقصد رکاوٹوں کی نشاندہی اور سیاحتی تجربے کو مزید بہتر بنانا ہے۔
یہ پروگرام ابوظبی محکمہ ثقافت و سیاحت اور زاید اتھارٹی برائے خصوصی افراد کے اشتراک سے انجام دیا جائے گا، جس کے تحت ابوظبی شہر، العین ریجن اور الظفرہ ریجن میں ہوٹلوں، ثقافتی مقامات، سیاحتی مراکز، شاپنگ مالز اور ساحلوں کا جائزہ لیا جائے گا۔
اس اقدام کا مقصد خصوصی افراد اور ان کے اہل خانہ کے لیے سیاحتی اور ثقافتی مقامات پر رسائی آسان بنانا، موجودہ رکاوٹوں کی نشاندہی اور سہولتوں میں بہتری کے لیے عملی اقدامات تجویز کرنا ہے۔
یہ تعاون 2022 میں شروع ہونے والی مشترکہ کوششوں کا تسلسل ہے، جس کے تحت پہلے ہی 190 سے زائد سیاحتی اور ثقافتی مقامات کا جائزہ لیا جاچکا ہے۔ نئے مرحلے میں جائزے کے طریقہ کار کو یکساں بنانے، ماہرین کی تربیت، مقامات کے دوروں اور نتائج کے تجزیے پر توجہ دی جائے گی، تاکہ بہتری کے لیے قابل عمل تجاویز مرتب کی جاسکیں۔
ابوظبی محکمہ ثقافت و سیاحت کے ڈائریکٹر جنرل برائے سیاحت صالح محمد الجزری نے کہا کہ رسائی کی سہولتیں ایسے سیاحتی مقام کی ترقی کا بنیادی حصہ ہیں جہاں ہر شخص کا خیرمقدم کیا جائے۔ زاید اتھارٹی برائے خصوصی افراد کے ساتھ تعاون کے ذریعے ماہرین کی صلاحیتوں اور جائزوں کے نتائج سے فائدہ اٹھاتے ہوئے ان شعبوں کی نشاندہی کی جارہی ہے جہاں مزید بہتری کی ضرورت ہے۔
زاید اتھارٹی برائے خصوصی افراد کے ڈائریکٹر جنرل عبداللہ الحمیدان نے کہا کہ مؤثر رسائی کے لیے خصوصی افراد کی ضروریات کو سمجھنا اور تکنیکی معیار کو عملی سہولتوں میں تبدیل کرنا ضروری ہے۔ اس تعاون سے جائزوں کے طریقہ کار کو یکساں بنانے، ماہرین کی صلاحیت بڑھانے اور زمینی مشاہدات کی بنیاد پر بہتری کے مواقع کی نشاندہی میں مدد ملے گی۔
انہوں نے کہا کہ یہ تعاون شمولیت کے دیگر اقدامات کا بھی حصہ ہے، جن میں دمج ایوارڈ شامل ہے، جو جامع خدمات، شمولیتی روزگار اور جسمانی و ڈیجیٹل رسائی کے شعبوں میں نمایاں اقدامات کو تسلیم کرتا ہے۔
دونوں ادارے متعلقہ حکومتی اداروں، سیاحتی مقامات اور سہولت فراہم کرنے والے اداروں کے ساتھ مل کر جائزوں کا دائرہ وسیع کرنے اور امارت کے سیاحتی شعبے میں عملی بہتری لانے کے لیے کام جاری رکھیں گے۔







