عنوان: متحدہ عرب امارات میں رمضان المبارک کے دوران عوامی سہولیات اور اوقات کار میں تبدیلی

خلیج اردو
دبئی: متحدہ عرب امارات میں رمضان المبارک کی آمد کے ساتھ ہی عوامی سہولیات، دفاتر، تعلیمی اداروں اور ٹرانسپورٹ کے اوقات کار میں تبدیلیاں کی گئی ہیں تاکہ روزہ داروں کو سہولت فراہم کی جا سکے۔

کام کے اوقات میں تبدیلی
سرکاری دفاتر کے اوقات پیر تا جمعرات صبح 9 بجے سے 2:30 بجے تک اور جمعہ کو 9 بجے سے 12 بجے تک مقرر کیے گئے ہیں۔ نجی شعبے میں کام کے اوقات میں روزانہ 2 گھنٹے کمی کی گئی ہے، جبکہ کچھ سرکاری ملازمین کو ریموٹ ورک کی اجازت بھی دی گئی ہے۔

تعلیمی اداروں کے اوقات
وزارت تعلیم کے مطابق، رمضان کے دوران ہر جمعہ کو سرکاری اسکولوں کے طلبہ کے لیے آن لائن کلاسز ہوں گی۔ دبئی کے نجی اسکولز کو بھی ریموٹ لرننگ کی اجازت دی گئی ہے، البتہ امتحانات والے طلبہ کو اسکول آنا ہوگا۔

ٹرانسپورٹ اور پارکنگ کے نئے اوقات
دبئی میٹرو پیر تا جمعرات اور ہفتہ کو صبح 5 بجے سے رات 12 بجے تک، جبکہ جمعہ کو صبح 5 بجے سے رات 1 بجے تک چلے گا۔
سلیک ٹول فیس میں بھی تبدیلی کی گئی ہے، جس کے تحت مخصوص اوقات میں ٹول مفت ہوگا۔

پارکنگ اوقات: دبئی میں پیر تا ہفتہ صبح 8 بجے سے شام 6 بجے اور رات 8 بجے سے 12 بجے تک فیس لاگو ہوگی، جبکہ اتوار کو مفت پارکنگ ہوگی۔

تفریحی مقامات اور پارکوں کے نئے اوقات
دبئی گلوبل ولیج اتوار تا بدھ شام 5 بجے سے رات 1 بجے اور جمعرات تا ہفتہ شام 5 بجے سے رات 2 بجے تک کھلا رہے گا۔

دبئی فریم صبح 10 بجے سے شام 7 بجے تک کھلا ہوگا۔

شارجہ کے پارک شام 4 بجے سے رات 12 بجے تک کھلے رہیں گے، جبکہ کچھ پارکس رات 1 بجے تک کھلے ہوں گے۔

افطار کے وقت توپ داغنے کی روایتی تقریب
دبئی اور شارجہ پولیس نے افطار کے وقت توپ داغنے کے مقامات کا اعلان کر دیا ہے، جس میں المجاز واٹر فرنٹ، الرحمانیہ سبرب کونسل اور الحمریہ سبرب کونسل شامل ہیں۔

خصوصی رعایتیں اور ہدایات
رمضان میں 644 سپر مارکیٹوں نے 10,000 سے زائد اشیاء پر 50 فیصد تک رعایت دینے کا اعلان کیا ہے۔

فنڈ ریزنگ کے لیے صرف لائسنس یافتہ پلیٹ فارمز کا استعمال کیا جائے۔
گلیوں میں بھیک مانگنا جرم ہے، جس پر 5000 درہم جرمانہ اور 3 ماہ قید ہو سکتی ہے۔
حکام نے تمام شہریوں اور رہائشیوں سے درخواست کی ہے کہ وہ رمضان کے مقدس مہینے کے دوران قوانین کی مکمل پاسداری کریں اور ایک دوسرے کے لیے آسانی پیدا کریں۔