واٹس ایپ کا نیا فیچر ‘گیسٹ چیٹس’، ماہرین نے خطرات سے خبردار کر دیا

خلیج اردو
دبئی: واٹس ایپ جلد ایک ایسا فیچر متعارف کرانے جا رہا ہے جس کے ذریعے صارفین اُن افراد سے بھی چیٹ کر سکیں گے جن کا واٹس ایپ اکاؤنٹ موجود نہیں ہوگا۔ یہ فیچر ابھی ابتدائی مرحلے میں ہے تاہم سائبر سکیورٹی ماہرین نے خبردار کیا ہے کہ اس سے حملہ آوروں کو اپنی شناخت چھپانے اور صارفین کو نقصان پہنچانے کے مزید مواقع مل سکتے ہیں۔

‘گیسٹ چیٹس’ نامی یہ فیچر ابھی بیٹا ورژن تک نہیں پہنچا، لیکن رپورٹ کے مطابق جلد ہی گوگل پلے بیٹا پروگرام میں اس کا اضافہ کیا جا سکتا ہے، جس کے ذریعے واٹس ایپ صارف ایک لنک بھیج کر غیر صارفین سے رابطہ کر سکیں گے۔

پالو آلٹو نیٹ ورکس کے چیف سکیورٹی آفیسر حیدر پاشا نے خلیج ٹائمز کو بتایا کہ یہ فیچر سائبر سکیورٹی خطرات بڑھا سکتا ہے کیونکہ اس سے شناخت چھپانا آسان ہوگا۔ ان کے مطابق حملہ آور جعلی روابط یا سوشل انجینئرنگ کے ذریعے صارفین کو دھوکا دے سکتے ہیں۔ انہوں نے کہا کہ ایسے حالات میں اعتماد قائم کرنا مزید مشکل ہو جائے گا اور صارفین کو ناآشنا افراد سے بات کرتے ہوئے انتہائی محتاط رہنا ہوگا۔

کاسپرسکی کے سینیئر سکیورٹی کنسلٹنٹ احمد اشرف نے کہا کہ ‘گیسٹ چیٹس’ میں لنک ہمیشہ ایک تصدیق شدہ واٹس ایپ اکاؤنٹ سے بھیجا جائے گا، تاہم اصل مسئلہ یہ ہے کہ مہمان چیٹ ونڈو میں واٹس ایپ صارف کی معلومات کس حد تک ظاہر ہوں گی۔ اگر نمبر یا پروفائل چھپایا گیا تو سامنے والے کی شناخت کی تصدیق مشکل ہوگی۔

ماہرین کا کہنا ہے کہ ممکنہ طور پر اس فیچر کے بعد دھوکہ دہی کے حملے بڑھ سکتے ہیں، کیونکہ واٹس ایپ صارفین بڑے پیمانے پر جعلی لنکس بھیج سکتے ہیں، اگرچہ میٹا کے پاس ایسے صارفین کی تفصیلات موجود ہوں گی تاکہ ان کے خلاف کارروائی کی جا سکے۔

حیدر پاشا نے مشورہ دیا کہ صارفین دوہری توثیق (Two-Factor Authentication) کا استعمال کریں، نامعلوم لنکس پر کلک نہ کریں، ذاتی معلومات شیئر نہ کریں اور اکاؤنٹ متاثر ہونے کی صورت میں فوراً ایپ دوبارہ انسٹال کر کے نیا ویریفیکیشن کوڈ حاصل کریں۔

اشرف نے مزید کہا کہ صارفین کو اپنے پروفائل کی حد بندی کرنی چاہیے تاکہ صرف ان کے روابط ہی تصویر، اسٹیٹس اور لاسٹ سین دیکھ سکیں۔ ساتھ ہی واٹس ایپ کو چاہیے کہ صارفین کو کسی بھی وقت ‘گیسٹ سیشن’ ختم کرنے کی سہولت فراہم کرے تاکہ اسپامرز اور حملہ آوروں سے بچا جا سکے۔