خلیج اردو
پیرس/ابوظبی: دنیا بھر میں عوامی تعطیلات کی تعداد کا موازنہ کیا جائے تو نیپال سرفہرست ہے، جہاں سالانہ 35 سرکاری تعطیلات دی جاتی ہیں، جبکہ متحدہ عرب امارات کے شہری ہر سال 13 عوامی تعطیلات سے لطف اندوز ہوتے ہیں۔
نیپال کے بعد بھارت، کولمبیا اور فلپائن ایسے ممالک ہیں جہاں سالانہ اوسطاً 18 تعطیلات ہوتی ہیں۔ یورپ میں سب سے زیادہ تعطیلات سلوواکیہ میں دی جاتی ہیں، جن کی تعداد 15 ہے۔
فرانس میں عوامی تعطیلات کی تعداد 11 ہے، تاہم حالیہ دنوں فرانس کے وزیر اعظم فرانسوا بیرو نے دو تعطیلات ختم کرنے کی تجویز دے کر سیاسی ہلچل پیدا کر دی ہے۔ ان کے بقول فرانس کو اقتصادی بحالی کے لیے قوم کو زیادہ کام کرنے کی ضرورت ہے۔
امریکہ میں 12 وفاقی تعطیلات تسلیم کی جاتی ہیں، مگر ہر ریاست میں ان کی نوعیت مختلف ہو سکتی ہے۔ نیدرلینڈز اور ڈنمارک میں صرف 9 عوامی تعطیلات ہوتی ہیں، جو یورپ میں سب سے کم تصور کی جاتی ہیں۔ کینیڈا اور انگلینڈ میں بھی سالانہ عوامی تعطیلات کی تعداد 10 سے کم ہے۔
متحدہ عرب امارات میں عوامی تعطیلات
یو اے ای میں عوامی تعطیلات کا نظام اسلامی کلینڈر پر مبنی ہوتا ہے، اور ہر سال رمضان کے دنوں کی تعداد کے مطابق کچھ تبدیلیاں آتی ہیں۔ سال 2025 میں درج ذیل تعطیلات دی جائیں گی:
-
نئے سال کا دن: 1 جنوری
-
عید الفطر: یکم تا 3 شوال (3 سے 4 دن)
-
یوم عرفہ: 9 ذو الحجہ
-
عید الاضحیٰ: 10 تا 12 ذو الحجہ (3 دن)
-
اسلامی نیا سال: 1 محرم
-
عید میلاد النبی: 12 ربیع الاول
-
قومی دن: 2 تا 3 دسمبر (2 دن)
یوں یو اے ای میں سالانہ عوامی تعطیلات کی تعداد 13 تک پہنچ سکتی ہے، جو خطے کے دیگر ممالک کے مقابلے میں مناسب سمجھی جاتی ہے۔
فرانس میں تعطیلات ختم کرنے کی تجویز
فرانسیسی وزیر اعظم فرانسوا بیرو نے ملک کے قرضوں میں کمی کے لیے 43.8 ارب یورو کی بچت اسکیم کے تحت دو عوامی تعطیلات ختم کرنے کی تجویز دی ہے۔ یہ تجویز 2003 کے ایک پرانے متنازعہ فیصلے کی یاد تازہ کرتی ہے جب اس وقت کے وزیر اعظم رافراں نے ’پینٹکوسٹ منڈے‘ کی تعطیل ختم کر دی تھی جس پر ملک گیر ہڑتالیں اور احتجاج ہوئے تھے، اور بالآخر انہیں استعفیٰ دینا پڑا تھا۔
