خلیج اردو
تہران/تل ابیب — ایران نے اسرائیل کی جانب سے جمعہ کو کی گئی وسیع حملہ آور کارروائی کے جواب میں اسرائیل پر سینکڑوں میزائل داغنے کا دعویٰ کیا ہے۔ ایرانی پاسدارانِ انقلاب کے مطابق، ان حملوں کا ہدف اسرائیل کے درجنوں اہم مقامات تھے۔
ایرانی جوابی کارروائی کے بعد تل ابیب اور یروشلم میں ایئر ریڈ سائرن بجنے لگے، جبکہ شہر میں متعدد مقامات سے دھوئیں کے بادل اٹھتے دکھائی دیے۔ مقامی میڈیا کے مطابق تل ابیب کے شہری علاقوں میں مبینہ میزائل حملوں کے بعد شدید دھماکوں کی آوازیں سنی گئیں، تاہم فوری طور پر کسی جانی نقصان کی تصدیق نہیں ہو سکی۔
اسرائیلی فوج نے تصدیق کی ہے کہ اسے ایران سے داغے گئے میزائلوں کا پتہ چلا ہے اور وہ "خطرے” کو روکنے کے لیے جوابی کارروائی میں مصروف ہے۔
ایرانی سپریم لیڈر آیت اللہ علی خامنہ ای نے جمعے کو جاری بیان میں کہا کہ اسرائیل نے جنگ کا آغاز کیا ہے اور اب اسے "مارو اور بھاگ جاؤ” کی پالیسی کی اجازت نہیں دی جائے گی۔ ان کا کہنا تھا:
"صہیونی حکومت اپنے جرائم کے سنگین نتائج سے محفوظ نہیں رہے گی۔ ایرانی عوام کو یقین ہونا چاہیے کہ ہمارا جواب آدھا ادھورا نہیں ہوگا۔”
یہ ایرانی ردعمل ایسے وقت میں سامنے آیا ہے جب اسرائیل نے گزشتہ روز ایران میں 200 سے زائد اہداف کو نشانہ بنایا تھا، جنہیں ایران اپنی خودمختاری پر حملہ قرار دے رہا ہے۔
