سموسوں پر جھگڑا، شوہر پر اہل خانہ کا حملہ، مقدمہ درج

خلیج اردو
بھارت کی ریاست اتر پردیش میں ایک انوکھا واقعہ پیش آیا جہاں پیلی بھیت کے علاقے میں ایک شخص پر اس کی بیوی اور سسرالیوں نے مبینہ طور پر اس وقت حملہ کر دیا جب وہ ان کے لیے سموسے نہ لا سکا۔ پولیس کے مطابق چار ملزمان کے خلاف اقدام قتل سمیت سنگین دفعات کے تحت مقدمہ درج کر لیا گیا ہے۔

پولیس رپورٹ کے مطابق متاثرہ شخص شویم کی شادی رواں سال سانگیتا سے ہوئی تھی۔ شویم کی والدہ نے درج کرائی گئی شکایت میں کہا کہ 30 اگست کو بیوی نے شوہر سے سموسے لانے کو کہا لیکن وہ خالی ہاتھ گھر لوٹا جس پر تنازع کھڑا ہوگیا۔

اگلے روز سانگیتا نے اپنے اہل خانہ کو بلا کر گاؤں کی پنچایت بٹھائی، جہاں تلخی بڑھی اور شویم پر اہل خانہ کے ساتھ تشدد کیا گیا۔ اس واقعے کی ویڈیو سوشل میڈیا پر وائرل ہونے کے بعد عوامی سطح پر حیرت اور غصے کا اظہار کیا جا رہا ہے۔

پولیس حکام کے مطابق واقعے کی مزید تحقیقات جاری ہیں جبکہ ملزمان کو اقدام قتل سمیت دیگر سنگین الزامات کا سامنا ہے۔