یو اے ای میں ریموٹ ورکنگ کے نئے قواعد: اوقاتِ کار اور چھٹیوں سے متعلق مکمل گائیڈ

خلیج اردو: متحدہ عرب امارات میں گھر سے کام (ریموٹ ورک) کرنے والے ملازمین کے لیے قواعد و ضوابط میں نرمی نہیں کی گئی بلکہ وہی قوانین لاگو ہوتے ہیں جو دفاتر میں کام کرنے والوں پر ہوتے ہیں۔ Ministry of Human Resources and Emiratization (MOHRE) کی جانب سے جاری نئی گائیڈ لائن میں واضح کیا گیا ہے کہ ریموٹ اور ہائبرڈ ورک کے لیے مکمل قانونی فریم ورک موجود ہے۔

اس گائیڈ کے مطابق ریموٹ ورک کا مطلب یہ ہے کہ ملازمین اپنی ذمہ داریاں دفتر سے باہر رہتے ہوئے ڈیجیٹل ذرائع کے ذریعے انجام دیں، لیکن اس سے ان کی تنخواہ، اوقاتِ کار، چھٹیاں یا دیگر حقوق متاثر نہیں ہوتے۔

کمپنیوں کے لیے واضح ہدایات دی گئی ہیں کہ وہ ملازمین کو شفاف معاہدہ فراہم کریں جس میں تنخواہ، کام کی نوعیت، اوقاتِ کار اور دیگر شرائط درج ہوں۔ آجر پر لازم ہے کہ وہ ملازمین کو ضروری آلات فراہم کرے، چھٹیاں دے، بروقت ادائیگیاں کرے اور کسی قسم کی بھرتی فیس وصول نہ کرے۔

دوسری جانب ملازمین پر بھی سخت ذمہ داریاں عائد کی گئی ہیں۔ انہیں خود کام مکمل کرنا ہوگا، مقررہ اوقات میں دستیاب رہنا ہوگا، کمپنی کے ڈیٹا کو محفوظ رکھنا ہوگا اور وقت پر رپورٹس جمع کرانی ہوں گی۔

اوقاتِ کار کے حوالے سے گائیڈ میں کہا گیا ہے کہ یومیہ 8 گھنٹے یا ہفتہ وار 48 گھنٹے کام کا معیار برقرار رہے گا، جبکہ اس سے زائد کام اوور ٹائم شمار ہوگا جس کی ادائیگی لازم ہے۔ ہر ہفتے کم از کم ایک دن کی تنخواہ کے ساتھ چھٹی بھی لازمی ہے۔

چھٹیوں کے قوانین بھی واضح ہیں۔ ایک سال مکمل کرنے والے ملازمین کو 30 دن کی سالانہ چھٹی ملے گی، جبکہ بیماری کی چھٹی 15 دن مکمل تنخواہ، 30 دن آدھی تنخواہ اور 45 دن بغیر تنخواہ کے ہوگی۔ زچگی کی چھٹی 60 دن مقرر ہے، جبکہ والدین، تعزیتی اور دیگر خصوصی چھٹیاں بھی فراہم کی جائیں گی۔

گائیڈ میں بدانتظامی (misconduct) کی بھی وضاحت کی گئی ہے۔ دورانِ کام غیر حاضر رہنا، کام میں تاخیر، ذاتی مصروفیات میں وقت گزارنا یا بغیر اجازت کام دوسروں کو دینا خلاف ورزی شمار ہوگی، جس پر تادیبی کارروائی یا ملازمت ختم بھی ہو سکتی ہے۔

حکام کے مطابق صرف لاگ ان ہونا کارکردگی کی دلیل نہیں، بلکہ کام کا معیار اور نتائج ہی اصل پیمانہ ہیں۔ اسی طرح آجر کو ملازمین کی نگرانی کی اجازت ہے، لیکن یہ نگرانی مناسب اور رازداری کا احترام کرتے ہوئے ہونی چاہیے۔

مجموعی طور پر اس نئی گائیڈ سے واضح ہوتا ہے کہ ریموٹ ورک صرف کام کی جگہ بدلتا ہے، قوانین اور ذمہ داریاں نہیں۔