خلیج اردو
دنیا بھر کے انٹرنیٹ صارفین نے منگل کی دوپہر کنیکٹیویٹی مسائل کا سامنا کیا جب Cloudflare میں اچانک خرابی کے باعث متعدد ویب سائٹس اور پلیٹ فارمز متاثر ہوئے۔
اس تعطل کے دوران ChatGPT سمیت مختلف AI پلیٹ فارمز اور سوشل میڈیا ویب سائٹ X کچھ صارفین کے لیے عارضی طور پر دستیاب نہ رہیں۔ Cloudflare کے مطابق “کمپنی کو متعدد صارفین کو متاثر کرنے والے مسئلے کا علم ہے اور تحقیقات جاری ہیں۔” کمپنی نے بتایا کہ وسیع پیمانے پر 500 ایررز، ڈیش بورڈ اور API سروسز بھی متاثر ہوئیں۔
کیلیفورنیا میں قائم Cloudflare ویب سائٹس، ویب ایپلی کیشنز اور نیٹ ورکس کی سیکیورٹی، کارکردگی اور قابلِ اعتماد کارکردگی بہتر بنانے کی اہم خدمات فراہم کرتا ہے۔
بعد ازاں کمپنی نے تصدیق کی کہ خرابی کی بنیادی وجہ کی نشاندہی کرلی گئی ہے اور اس کا حل نافذ کیا جا رہا ہے، جس کے نتیجے میں تمام متاثرہ سروسز بحالی کے مرحلے میں داخل ہو چکی ہیں۔ Cloudflare Access اور WARP جیسی خدمات کے ایررز بھی معمول کی سطح پر واپس آگئے ہیں۔
متاثرہ ویب سائٹس اب معمول کے مطابق لوڈ ہو رہی ہیں۔ کمپنی نے کہا ہے کہ صورتحال پر مسلسل نظر رکھی جا رہی ہے اور صارفین کو تازہ اپ ڈیٹس کے لیے اسٹیٹس پیج دیکھنے کی ہدایت کی گئی ہے۔
