ایپل کی اگلی آئی فون سافٹ ویئر اپ ڈیٹ آئی او ایس 26.3 جلد جاری ہونے کی توقع ہے، جو اس وقت بیٹا ٹیسٹنگ کے آخری مرحلے میں داخل ہو چکی ہے۔ امکان ہے کہ یہ اپ ڈیٹ جنوری کے آخری دنوں یا فروری کے آغاز میں عوام کے لیے دستیاب ہوگی۔
فوربز کے مطابق آئی او ایس 26.3 کو ایک اہم اپ ڈیٹ قرار دیا جا رہا ہے، جو آئی او ایس 26 کے بعد ایپل کے معمول کے درمیانی مرحلے کے ریلیز شیڈول کا حصہ ہے۔
ایپل نے 12 جنوری کو آئی او ایس 26.3 کا دوسرا ڈویلپر بیٹا جاری کیا، جبکہ ایک دن بعد پبلک بیٹا 2 بھی متعارف کرایا گیا، جس سے ظاہر ہوتا ہے کہ اپ ڈیٹ حتمی تیاری کے مرحلے میں ہے۔ ماضی کے رجحانات کے مطابق ایپل کی .3 اپ ڈیٹس عموماً جنوری کے آخر یا فروری کے آغاز میں جاری کی جاتی ہیں۔
ابتدائی رپورٹس کے مطابق آئی او ایس 26.3 میں کسی بڑی ظاہری تبدیلی کی توقع نہیں، تاہم اس میں فیچرز میں بہتری، سسٹم لیول تبدیلیاں اور مستقبل کی اپ ڈیٹس کے لیے تکنیکی بنیاد شامل ہو سکتی ہے۔ میک رومرز کے مطابق بیٹا ورژن میں چند نئے فیچرز کے ساتھ اندرونی سسٹم اپ ڈیٹس شامل ہیں۔
اس اپ ڈیٹ میں آر سی ایس میسجنگ سیکیورٹی پر خاص توجہ دی جا رہی ہے۔ ٹائمز آف انڈیا کی رپورٹ کے مطابق آئی او ایس 26.3 میں اینڈرائیڈ اور آئی فون کے درمیان آر سی ایس میسجز کے لیے اینڈ ٹو اینڈ انکرپشن کی تیاری کے شواہد ملے ہیں، جو صارفین کی پرائیویسی کو مزید مضبوط بنا سکتی ہے۔
یورپی یونین کے قوانین سے متعلق تبدیلیاں بھی اس اپ ڈیٹ کا حصہ ہو سکتی ہیں۔ میک ورلڈ کے مطابق آئی او ایس 26.3 میں تھرڈ پارٹی ڈیوائسز کے ساتھ نوٹیفکیشن ہینڈلنگ اور ڈیوائس سوئچنگ سے متعلق نئی صلاحیتوں کی بنیاد رکھی جا رہی ہے۔
اگرچہ یہ اپ ڈیٹ بظاہر محدود نظر آتی ہے، تاہم ایپل کی ایسی اپ ڈیٹس میں سیکیورٹی فکسز نہایت اہم ہوتی ہیں۔ ایپل عام طور پر صارفین کو سیکیورٹی خطرات سے بچاؤ کے لیے اپ ڈیٹ فوری انسٹال کرنے کی ہدایت کرتا ہے۔
آئی او ایس 26 کے بعد آنے والی اس اپ ڈیٹ کو صارفین کی جانب سے خاص توجہ حاصل ہے، اور آئندہ چند ہفتوں میں آئی او ایس 26.3 دنیا بھر کے لاکھوں آئی فون صارفین کے لیے نیا ڈیفالٹ ورژن بننے جا رہا ہے۔
