خلیج اردو
راولپنڈی، 22 اکتوبر 2025: پاکستان نیوی کے جہاز پی این ایس یرموک نے سعودی قیادت میں کام کرنے والے کمبائنڈ ٹاسک فورس 150 (سی ٹی ایف 150) کے تحت شمالی بحیرہ عرب میں ایک بڑی انسدادِ منشیات کارروائی کامیابی سے انجام دی، جس کے نتیجے میں تقریباً 972 ملین امریکی ڈالر مالیت کی منشیات ضبط کی گئیں۔
آئی ایس پی آر کے مطابق یہ شاندار کامیابی پاکستان نیوی کے علاقائی بحری سلامتی، عالمی امن اور سمندری راستوں پر غیر قانونی اسمگلنگ کے خاتمے کے عزم کی عکاسی کرتی ہے۔
پی این ایس یرموک کی یہ کارروائی بین الاقوامی کمبائنڈ ٹاسک فورس 150 کے حصے کے طور پر انجام دی گئی، جو بحری استحکام کو یقینی بنانے، دہشت گردی اور غیر قانونی سرگرمیوں کی روک تھام پر مرکوز ہے۔ یہ کامیابی اس بات کا ثبوت ہے کہ پاکستان عالمی بحری امن و سلامتی میں ایک ذمہ دار شراکت دار کے طور پر فعال کردار ادا کر رہا ہے۔
چیف آف دی نیول اسٹاف ایڈمرل نوید اشرف نے کامیاب آپریشن پر پی این ایس یرموک کے عملے کی پیشہ ورانہ صلاحیتوں اور عزم کو سراہا۔ انہوں نے کہا کہ پاکستان نیوی قومی بحری مفادات کے تحفظ کے ساتھ ساتھ عالمی امن کے لیے مشترکہ تعاون اور مربوط بحری سلامتی کے اقدامات جاری رکھے گی۔ ایڈمرل نوید اشرف نے کہا کہ سعودی قیادت میں ہونے والی یہ کارروائی پاکستان اور سعودی عرب کی بحری افواج کے درمیان تعاون اور دفاعی روابط کو مزید مضبوط کرے گی۔
