خلیج اردو
اسلام آباد: پاکستان کی سپریم کورٹ کی عمارت میں منگل کے روز ایک دھماکہ ہوا جس کے نتیجے میں کم از کم 12 افراد زخمی ہوگئے۔ واقعے کے بعد عمارت اور اردگرد کے علاقے کو فوری طور پر سیکیورٹی کے حصار میں لے لیا گیا۔
ابتدائی اطلاعات کے مطابق دھماکہ سپریم کورٹ کی عمارت کے تہہ خانے میں واقع ڈائننگ ایریا میں ہوا جس سے عمارت کے مختلف حصوں میں جھٹکے محسوس کیے گئے۔ دھماکے کی شدت اتنی زیادہ تھی کہ عمارت کے اندرونی حصوں کو نقصان پہنچا، جبکہ کورٹ روم نمبر 6 میں چھت کا ایک حصہ گرنے کی اطلاعات بھی موصول ہوئیں۔
قانون نافذ کرنے والے اداروں اور امدادی عملے نے موقع پر پہنچ کر علاقے کو گھیرے میں لے لیا، جب کہ بم ڈسپوزل اسکواڈ اور فرانزک ماہرین نے شواہد اکٹھے کرنے اور دھماکے کی نوعیت جاننے کے لیے تحقیقات شروع کر دی ہیں۔
ابتدائی طور پر کسی جانی نقصان کی اطلاع نہیں ملی، تاہم زخمیوں کو قریبی اسپتال منتقل کر دیا گیا ہے جہاں انہیں طبی امداد فراہم کی جا رہی ہے۔ واقعے کے بعد سپریم کورٹ کی عمارت میں تمام عدالتی کارروائیاں عارضی طور پر معطل کر دی گئی ہیں۔
