خلیج اردو
خلیجی ممالک میں بڑھتی مہنگائی اور تنخواہوں میں جمود کے باعث یو اے ای کے ملازمین میں بہتر معاوضے کیلئے نوکری تبدیل کرنے کا رجحان تیزی سے بڑھ رہا ہے۔ جی سی سی سیلری گائیڈ کے مطابق 98 فیصد یو اے ای ملازمین 2026 میں نئی ملازمت اختیار کرنے پر آمادہ ہیں۔
فلیچر پِکولو ایسوسی ایٹس کے شریک بانی ٹونی پِکولو کے مطابق، "98 فیصد پروفیشنلز کا نئی ملازمت کیلئے تیار ہونا اس بات کا ثبوت ہے کہ لوگ مہنگائی کے اثرات سے نمٹنے کیلئے بہتر تنخواہوں کی تلاش میں ہیں”۔
سروے میں انکشاف ہوا کہ 2025 میں 82 فیصد اداروں نے تنخواہوں میں اضافہ نہیں کیا جبکہ 51 فیصد ملازمین کو بونس بھی نہیں ملا۔ یو اے ای میں 35 فیصد پروفیشنلز نے کہا کہ وہ 2026 میں تنخواہ میں بہتری چاہتے ہیں۔
تحقیق کے مطابق خلیج میں 2026 کے دوران تنخواہوں میں اوسط اضافہ پانچ فیصد تک متوقع ہے، تاہم اس کے باوجود ملازمین کی بڑی تعداد کیریئر ترقی، بہتر قیادت، کام کے دباؤ میں کمی اور لچکدار اوقات کو زیادہ اہمیت دے رہی ہے۔
ماہرین کا کہنا ہے کہ یو اے ای میں بڑھتی آبادی اور بڑے ترقیاتی منصوبوں کے باعث ملازمتوں کے مواقع میں اضافہ ہو رہا ہے، تاہم آجر اب مقامی تجربے کو ترجیح دے رہے ہیں۔ رپورٹ کے مطابق تقریباً 40 فیصد یو اے ای ادارے ایسے امیدواروں کو ملازمت دینے پر آمادہ نہیں جو مقامی تجربہ نہ رکھتے ہوں۔
ٹونی پِکولو کے مطابق، "ادارے ایسے افراد چاہتے ہیں جو فوری طور پر نتائج دے سکیں، اسی لیے پراجیکٹ مینجمنٹ، ڈیزائن اور کمرشل شعبوں میں طلب زیادہ ہے”۔
سروے میں یہ بھی بتایا گیا کہ گزشتہ برس 40 فیصد یو اے ای اداروں نے افرادی قوت میں 20 سے 30 فیصد اضافہ کیا، جبکہ 41 فیصد کمپنیاں رواں برس مزید 20 فیصد عملہ بھرتی کرنے کا ارادہ رکھتی ہیں۔
تجزیہ کاروں کے مطابق ملازمین کی بڑھتی نقل و حرکت اور آجرین کی مقامی تجربے پر توجہ آنے والے برسوں میں یو اے ای کی جاب مارکیٹ کو مزید مسابقتی بنا دے گی۔
