خلیج اردو
اتصالات کی 50ویں سالگرہ پر صارفین کے لیے مفت ڈیٹا کا تحفہ، ہر سال پر ایک جی بی اضافی ڈیٹا ملے گا
متحدہ عرب امارات کی ٹیلی کمیونیکیشن کمپنی اتصالات نے اپنی خدمات کے 50 سال مکمل ہونے پر صارفین کے لیے مفت ڈیٹا دینے کا اعلان کردیا ہے۔ کمپنی کی جانب سے منگل کو صارفین کو بھیجے گئے پیغامات میں بتایا گیا کہ ہر صارف کو اتصالات کے ساتھ وابستگی کے ہر سال کے عوض ایک جی بی مفت ڈیٹا فراہم کیا جائے گا۔
اماراتی پلان استعمال کرنے والے صارفین کو خصوصی طور پر زیادہ ڈیٹا دیا جائے گا۔ ایسے صارفین کو اتصالات کے ساتھ وابستگی کے ہر سال کے بدلے 10 جی بی مفت ڈیٹا فراہم کیا جارہا ہے۔ مفت ڈیٹا کی مدت ایک ہفتے ہوگی اور صارفین یہ سہولت 13 اکتوبر تک حاصل کرسکیں گے۔
اتصالات کا قیام 1976 میں ایمریٹس ٹیلی کمیونیکیشنز کارپوریشن کے نام سے عمل میں آیا تھا اور کمپنی نے رواں سال اپنی 50 سالہ خدمات مکمل کی ہیں۔ یہ متحدہ عرب امارات کی پہلی ٹیلی کمیونیکیشن کمپنی تھی، جس کا آغاز ملک کے قیام کے صرف پانچ سال بعد ایک مشترکہ منصوبے کے طور پر ہوا تھا۔
کمپنی نے 2022 میں اپنا نام تبدیل کرکے ای اینڈ رکھا تھا، تاہم 50 سال مکمل ہونے پر اعلان کیا گیا کہ مستقبل میں کمپنی دوبارہ اپنے اصل نام اتصالات کے تحت کام کرے گی۔ مفت ڈیٹا صارفین کے لیے سالگرہ کے موقع پر متعارف کرائی جانے والی متعدد خصوصی سہولیات میں سے ایک ہے۔
صارفین کو دیگر فوائد میں ڈیوائسز پر 90 فیصد تک رعایت اور پوسٹ پیڈ صارفین کے لیے پانچ گنا زیادہ ڈیٹا بھی شامل ہے۔ اتصالات صارفین کے لیے 10 سے زائد خصوصی سالگرہ پیکجز متعارف کرائے گئے ہیں۔
ایک خصوصی 10 جی بی ڈیٹا پیکج کے تحت صارفین کو ایک مرتبہ 50 جی بی ڈیٹا فراہم کیا جارہا ہے۔ اس پیکج کی قیمت 200 درہم ہے اور اس کی مدت 30 دن ہوگی۔
رومنگ صارفین کے لیے بھی خصوصی سہولت متعارف کرائی گئی ہے۔ مقبول ہفتہ وار رومنگ کومبو پیکج میں 2.5 جی بی کے بجائے 5 جی بی ڈیٹا اور ایک ہفتے کے لیے 500 رومنگ منٹس فراہم کیے جارہے ہیں۔ اس اضافی سہولت سے فائدہ اٹھانے کے لیے صارفین کو 9 اکتوبر تک پیکج استعمال کرنا شروع کرنا ہوگا، جبکہ 10 اکتوبر سے نئی خریداریوں پر معمول کا ڈیٹا الاؤنس بحال ہوجائے گا۔
اس پیکج کے صارفین کو اتصالات کے سفری شراکت داروں کی جانب سے اسمایلز ایپ پر ڈسکاؤنٹ واؤچرز بھی ملیں گے، جو چھ ماہ تک قابل استعمال ہوں گے۔
اتصالات نے اپنے 50 سالہ سفر کے دوران متحدہ عرب امارات کی ٹیلی کمیونیکیشن اور ڈیجیٹل ترقی میں اہم کردار ادا کیا۔ کمپنی نے 1995 میں خطے میں پہلی مرتبہ متحدہ عرب امارات میں انٹرنیٹ متعارف کرایا جبکہ 2003 میں تھری جی اور ایم ایم ایس سروسز شروع کیں۔ بعد ازاں کمپنی نے مشرق وسطیٰ، ایشیا اور وسطی یورپ کی متعدد ٹیلی کمیونیکیشن کمپنیوں میں حصص حاصل کرکے اپنے عالمی نیٹ ورک کو بھی وسعت دی۔
