خلیج اردو
شارجہ پولیس نے ایک لاکھ ڈالر سے زائد مالیت کی قیمتی عنبر کی تسبیحیں چوری کرنے کے الزام میں دو مشتبہ افراد کو گرفتار کرلیا۔ پولیس نے اطلاع ملنے کے 24 گھنٹے سے بھی کم وقت میں چوری شدہ تمام تسبیحیں برآمد کرلیں۔
پولیس کے مطابق چینی شہری نے سوشل میڈیا پر تسبیحوں کی فروخت کا اشتہار دیا تھا جس کے بعد ایک شخص نے پوری کھیپ خریدنے میں دلچسپی ظاہر کرتے ہوئے متاثرہ شخص سے رابطہ کیا۔
خریداری کے لیے تسبیحیں دیکھنے کا بہانہ بنا کر ملزمان نے متاثرہ شخص کو شارجہ کے ایک علاقے میں بلایا جہاں مبینہ طور پر دھوکے سے تسبیحیں لے کر فرار ہوگئے۔
شارجہ پولیس کے محکمہ تحقیقات جرائم کے ڈائریکٹر ڈاکٹر خلیفہ الحی نے بتایا کہ اطلاع ملتے ہی خصوصی ٹیموں نے تلاش اور تحقیقات شروع کردیں۔ ٹیموں نے شواہد اکٹھے کیے، دستیاب معلومات کا تجزیہ کیا اور جدید سکیورٹی ٹیکنالوجی کے ذریعے ملزمان کی شناخت اور نقل و حرکت کا سراغ لگایا۔
تحقیقات کے نتیجے میں دونوں ملزمان کی شناخت کرکے انہیں ایک ہمسایہ ریاست میں تلاش کرلیا گیا۔ متعلقہ ریاست کی سکیورٹی حکام کے تعاون سے شارجہ پولیس کی ٹیموں نے کارروائی کرتے ہوئے دونوں ملزمان کو گرفتار کرلیا اور تمام چوری شدہ تسبیحیں 24 گھنٹے سے بھی کم وقت میں برآمد کرلیں۔
شارجہ پولیس نے شہریوں کو سوشل میڈیا کے ذریعے اشیا کی خرید و فروخت میں احتیاط برتنے کی ہدایت کرتے ہوئے کہا ہے کہ نامعلوم خریداروں اور فروخت کنندگان کی شناخت کی تصدیق کی جائے اور لین دین کے لیے محفوظ اور سرکاری مقامات کا انتخاب کیا جائے۔
