ٹرمپ کی کارکردگی پر امریکیوں کا عدم اطمینان، معیشت سے نمٹنے میں غیرواضح حکمت عملی پر تنقید

خلیج اردو
نیویارک: امریکی ٹی وی سی بی ایس کی جانب سے جاری کیے گئے ایک حالیہ سروے کے مطابق، 53 فیصد امریکیوں نے صدر ڈونلڈ ٹرمپ کی کارکردگی پر عدم اطمینان کا اظہار کیا ہے۔

سروے میں بتایا گیا کہ 56 فیصد امریکیوں کا خیال ہے کہ ٹرمپ کے معیشت سے نمٹنے کے اقدامات ناکافی ہیں اور وہ اس بات سے غیر مطمئن ہیں کہ حکومت کس طرح ملکی معیشت کو سنبھالنے میں ناکام نظر آ رہی ہے۔

سروے میں مزید انکشاف کیا گیا کہ 63 فیصد امریکیوں کا ماننا ہے کہ ٹرمپ کی حکومت کے پاس ٹیرف سے متعلق کوئی واضح اور ٹھوس منصوبہ نہیں ہے، جو امریکی معیشت کے لیے مزید مسائل پیدا کر رہا ہے۔ 53 فیصد کا یہ بھی کہنا ہے کہ امریکی معیشت بدتر ہو رہی ہے اور اس کی ترقی کی رفتار سست پڑ گئی ہے۔

اگرچہ 47 فیصد امریکی ابھی بھی صدر ٹرمپ کی کارکردگی سے مطمئن ہیں، لیکن ان کی تعداد میں کمی واقع ہو رہی ہے، خاص طور پر جب عوام معیشت کے حوالے سے حکومت کے اقدامات کو غیر مؤثر اور غیر واضح سمجھتے ہیں۔

اس سروے کے نتائج سے یہ ظاہر ہوتا ہے کہ امریکی عوام کی اکثریت موجودہ انتظامیہ کی اقتصادی پالیسیوں کے بارے میں شکوک و شبہات کا شکار ہے۔