مشفیق الرحیم نے یونس خان کا ریکارڈ توڑ دیا، سری لنکا میں سب سے عمر رسیدہ سنچری میکر بن گئے

خلیج اردو
گال: بنگلہ دیش کے تجربہ کار بیٹر مشفیق الرحیم نے ٹیسٹ کرکٹ میں نئی تاریخ رقم کر دی۔ انہوں نے گال ٹیسٹ کے دوران اپنی 12ویں ٹیسٹ سنچری اسکور کرتے ہوئے پاکستان کے عظیم بیٹر یونس خان کا "سب سے عمر رسیدہ ٹیسٹ سنچری میکر” کا ریکارڈ توڑ دیا ہے۔

مشفیق الرحیم نے یہ شاندار سنچری 38 سال اور 39 دن کی عمر میں بنائی، جبکہ یونس خان نے اپنا یہ کارنامہ 37 سال اور 216 دن کی عمر میں انجام دیا تھا۔ اس کے ساتھ ہی مشفیق الرحیم سری لنکا میں اوپنر کے علاوہ سب سے زیادہ عمر میں سنچری بنانے والے کھلاڑی بن گئے ہیں۔

ان کی یہ اننگز نہ صرف ان کے ذاتی کیریئر کے لیے اہم سنگ میل ہے بلکہ بنگلہ دیشی کرکٹ کے لیے بھی ایک فخر کا لمحہ ہے۔ ماہرین کرکٹ کے مطابق مشفیق کی یہ کارکردگی ان کے تسلسل، تجربے اور فٹنس کا ثبوت ہے۔