خلیج اردو
غزہ –برطانیہ، فرانس، جاپان، آسٹریلیا اور کینیڈا سمیت 28 ممالک نے ایک مشترکہ اعلامیے میں اسرائیل کی جانب سے غزہ میں امداد کے منتظر شہریوں کے "غیر انسانی قتل” کی شدید مذمت کی ہے۔ اس بیان میں واضح طور پر غزہ میں فوری جنگ بندی کا مطالبہ کیا گیا ہے اور اسرائیلی حکمت عملی کو انسانی وقار کے منافی قرار دیا گیا ہے۔
بیان میں کہا گیا ہے کہ غزہ کے شہریوں کو پہنچنے والی تکالیف نئی گہرائیوں کو چھو رہی ہیں۔ یہ مشترکہ موقف ایسے وقت سامنے آیا ہے جب غزہ میں جاری جنگ 21 ویں ماہ میں داخل ہو چکی ہے اور غذائی قلت، پانی کی کمی اور بمباری کے سبب شہری شدید اذیت کا شکار ہیں۔
اعلامیے پر دستخط کرنے والے ممالک میں برطانیہ، آسٹریلیا، کینیڈا، فرانس، اٹلی، جاپان، نیوزی لینڈ اور سوئٹزرلینڈ شامل ہیں۔ ان ممالک کے وزرائے خارجہ نے اسرائیلی کارروائیوں کو غیر انسانی قرار دیتے ہوئے کہا ہے کہ امدادی سامان حاصل کرنے کی کوشش میں اب تک 800 سے زائد فلسطینی جاں بحق ہو چکے ہیں۔
بیان میں کہا گیا ہے کہ اسرائیل کی طرف سے امدادی ترسیل کا نظام نہ صرف خطرناک ہے بلکہ یہ خطے میں مزید عدم استحکام کا سبب بھی بن رہا ہے۔ فلسطینی وزارت صحت کے مطابق حالیہ ہفتے میں اسرائیلی فائرنگ سے 100 سے زائد افراد مارے گئے جبکہ غذائی قلت کے باعث مزید 19 افراد جاں بحق ہوئے۔
اعلامیے میں خاص طور پر بچوں، خواتین اور بزرگوں کے قتل پر گہری تشویش کا اظہار کیا گیا ہے اور کہا گیا ہے کہ عالمی برادری کو اس صورتحال پر فوری کارروائی کرنی چاہیے۔
