خلیج اردو
مکہ مکرمہ: برطانیہ کے شہر کیمبرج میں چاقو کے حملے میں جاں بحق ہونے والے سعودی طالبعلم محمد القاسم کی نمازِ جنازہ جمعہ کے روز مسجد الحرام مکہ میں ادا کی جائے گی، جہاں وہ ماضی میں حجاج کرام کی خدمت کیا کرتے تھے۔ یہ اعلان حرمین کی جانب سے جمعرات 7 اگست کو کیا گیا۔
محمد القاسم، جو کیمبرج میں انگریزی زبان کا 10 ہفتے کا کورس کر رہے تھے، یکم اگست کو ایک "بلااشتعال” چاقو حملے میں ہلاک ہو گئے۔ پولیس کے مطابق وہ مل پارک کے علاقے میں زخمی حالت میں پائے گئے اور موقع پر ہی دم توڑ گئے۔
سعودی سفارتخانے نے بیان میں کہا ہے کہ وہ مقامی حکام سے رابطے میں ہے تاکہ واقعے کی تحقیقات مکمل کی جا سکیں اور میت کو سعودی عرب منتقل کرنے کے انتظامات کیے جا سکیں۔ سفارتخانے نے لواحقین سے دلی تعزیت کا اظہار کیا ہے۔
محمد القاسم مسجد الحرام میں بطور رضاکار خدمات انجام دیتے رہے، جہاں وہ ضعیف حجاج کی مدد اور کھوئے ہوئے زائرین کی راہنمائی کرتے تھے۔ حرمین کی آفیشل سوشل میڈیا نے انہیں "خاموش خلوص کے ساتھ خدمات انجام دینے والا روشن کردار” قرار دیا ہے۔
محمد القاسم کی یاد میں حرمین انتظامیہ اور امت مسلمہ نے ان کے درجات کی بلندی اور اللہ کی رحمت کی دعا کی ہے۔
Funeral of Saudi student Muhammad Al-Qassem to be held in Masjid Al Haram, Makkah
