پی سی بی نے سینٹرل کنٹریکٹ کا اعلان کردیا؛ بابر اور رضوان کو تنزلی، کوئی کھلاڑی کیٹیگری اے میں شامل نہیں

خلیج اردو
لاہور: پاکستان کرکٹ بورڈ نے 2025-26 کے لیے کھلاڑیوں کے سینٹرل کنٹریکٹس کا اعلان کردیا ہے، جس میں سابق کپتان بابر اعظم اور وکٹ کیپر بلے باز محمد رضوان کو کیٹیگری اے سے تنزلی دے کر کیٹیگری بی میں شامل کیا گیا ہے۔ اس بار کسی بھی کھلاڑی کو کیٹیگری اے میں جگہ نہیں ملی۔

گزشتہ سال بابر اعظم اور محمد رضوان ہی کیٹیگری اے میں شامل تھے تاہم نئے معاہدے میں دونوں کو کیٹیگری بی میں منتقل کردیا گیا ہے۔ دونوں کھلاڑی آئندہ ماہ ہونے والے ایشیا کپ کے اسکواڈ سے بھی باہر ہیں۔

کل 30 کھلاڑیوں کو سینٹرل کنٹریکٹس دیے گئے ہیں جن میں 10 کھلاڑی کیٹیگری بی میں شامل ہیں۔ اس فہرست میں بابر اعظم، فخر زمان، شاہین شاہ آفریدی، شاداب خان، حارث رؤف، ابرار احمد، صائم ایوب اور سلمان علی آغا شامل ہیں۔

کیٹیگری سی اور ڈی میں بالترتیب 10، 10 کھلاڑی شامل ہیں، جب کہ 12 نئے نام پہلی مرتبہ کنٹریکٹ لسٹ کا حصہ بنے ہیں، جن میں احمد دانیال، فہیم اشرف، حسن علی، حسن نواز، حسین طلعت، خوشدل شاہ، محمد عباس، محمد حارث، محمد نواز، صہیبزادہ فرحان، سلمان مرزا اور سفیان مقیم شامل ہیں۔

پی سی بی کے مطابق اس بار گزشتہ سال کے 27 کے مقابلے میں کھلاڑیوں کی تعداد بڑھا کر 30 کردی گئی ہے تاکہ نئے ٹیلنٹ کو موقع دیا جاسکے اور ٹیم کی مستقبل کی ڈپتھ بہتر بنائی جا سکے۔

دوسری جانب آٹھ کھلاڑی اس بار کنٹریکٹ حاصل کرنے میں ناکام رہے جن میں عامر جمال، حسیب اللہ، کامران غلام، میر حمزہ، محمد علی، محمد حریرہ، محمد عرفان خان اور عثمان خان شامل ہیں۔