لوگ طعنے دیتے تھے،غصے میں آکر قتل کیا،لاہور میں ذہنی معذور 15 سالہ بیٹی باپ اور دو چچاؤں کے ہاتھوں قتل،انتباہ: اس رپورٹ کے کچھ حصہ آپ کیلئے تکلیف دہ ہو سکتے ہیں

خلیج اردو
لاہور:لاہور کے علاقے ماڈل ٹاؤن میں انسانیت سوز واقعہ پیش آیا ہے جہاں ایک ذہنی معذور 15 سالہ لڑکی کو اُس کے والد اور دو سگے چچاؤں نے مبینہ طور پر گلا دبا کر قتل کر دیا۔ پولیس کے مطابق واقعہ ماڈل ٹاؤن تھانے کی حدود میں پیش آیا جہاں لڑکی کو پہلے مارا پیٹا گیا اور بعدازاں گلا گھونٹ کر قتل کر دیا گیا۔

پولیس نے فوری کارروائی کرتے ہوئے مقتولہ کے والد اور دونوں چچاؤں کو گرفتار کر لیا۔ تینوں ملزمان نے دورانِ تفتیش اپنے جرم کا اعتراف کرتے ہوئے بتایا کہ لڑکی ذہنی طور پر معذور تھی اور اکثر گھر سے باہر نکل جاتی تھی، جس کے باعث محلے میں لوگ طعنے دیتے تھے اور بدنامی کا سامنا کرنا پڑتا تھا۔ اسی سماجی دباؤ اور طیش کی کیفیت میں انہوں نے مل کر اسے قتل کرنے کا فیصلہ کیا۔

ملزمان نے اعتراف کیا کہ انہوں نے طعنوں سے تنگ آ کر اپنی ہی معذور بیٹی کو جان سے مار دیا۔ پولیس کے مطابق مقتولہ کی لاش پوسٹ مارٹم کے لیے اسپتال منتقل کر دی گئی ہے اور واقعے کا مقدمہ ماڈل ٹاؤن تھانے میں درج کر لیا گیا ہے۔

پولیس حکام نے بتایا کہ یہ ایک افسوسناک اور انتہائی ظالمانہ واقعہ ہے، اور قانون کے مطابق ملزمان کو قرار واقعی سزا دلوائی جائے گی۔ سوشل ویلفیئر اداروں اور انسانی حقوق کے کارکنوں نے اس واقعے پر شدید غم و غصے کا اظہار کرتے ہوئے کہا ہے کہ معذور بچوں کے ساتھ ظلم ناقابلِ برداشت ہے اور حکومت کو ایسے واقعات کی روک تھام کے لیے فوری اقدامات کرنے ہوں گے۔