آئی ایس آئی نے نے قومی مفادات کے تحفظ اور پیچیدہ حالات میں درست سکیورٹی فیصلوں کی رہنمائی میں کلیدی کردار ادا کیا،وزیرِاعظم کا دورہ آئی ایس آئی ہیڈکوارٹرز، ملکی سلامتی کی صورتحال پر تفصیلی بریفنگ

خلیج اردو
اسلام آباد، 6 مئی 2025
وزیرِاعظم محمد شہباز شریف نے آج ڈپٹی وزیراعظم و وزیرِ خارجہ، وزیرِ دفاع اور تینوں مسلح افواج کے سربراہان کے ہمراہ انٹر سروسز انٹیلی جنس (آئی ایس آئی) کے ہیڈکوارٹرز کا دورہ کیا۔

اس موقع پر وزیرِاعظم کو ملک کی سکیورٹی صورتحال پر تفصیلی بریفنگ دی گئی، جس میں بھارت کی مشرقی سرحد پر بڑھتی ہوئی جارحانہ اور اشتعال انگیز حکمتِ عملی کے تناظر میں روایتی خطرات سے نمٹنے کی تیاریوں پر خاص توجہ مرکوز کی گئی۔ بریفنگ میں علاقائی سلامتی کی صورتحال، روایتی فوجی خطرات، ہائبرڈ وارفیئر حکمتِ عملیوں اور دہشتگرد پراکسیز سمیت ابھرتے ہوئے خطرات کے متعلق آگاہ کیا گیا۔

وزیرِاعظم اور ان کے ہمراہ اعلیٰ قیادت نے قومی چوکسی میں اضافے، ادارہ جاتی ہم آہنگی اور مؤثر آپریشنل تیاری کو ملکی خودمختاری و سالمیت کے ہر ممکن تحفظ کے لیے ناگزیر قرار دیا۔

وزیرِاعظم نے آئی ایس آئی کی پیشہ ورانہ صلاحیتوں اور اسٹریٹجک بصیرت کو سراہتے ہوئے کہا کہ ایجنسی نے قومی مفادات کے تحفظ اور پیچیدہ حالات میں درست سکیورٹی فیصلوں کی رہنمائی میں کلیدی کردار ادا کیا ہے۔

انہوں نے کہا کہ پوری قوم اپنی بہادر افواج کے ساتھ کھڑی ہے۔ "پاکستان آرمی دنیا کی سب سے پیشہ ور اور منظم افواج میں سے ایک ہے”۔

اعلیٰ قیادت نے اس عزم کا اعادہ کیا کہ پاکستان ہر قسم کے خطرات، خواہ روایتی ہوں یا غیر روایتی، کا پوری قوت سے دفاع کرے گا اور قوم کی مکمل حمایت کے ساتھ مسلح افواج اور ریاستی ادارے ہر حالت میں پاکستان کی سلامتی، وقار اور عزت کی حفاظت کے لیے ہمہ وقت تیار ہیں۔