وزیراعظم شہباز شریف اور ایمل ولی خان کا ٹیلیفونک رابطہ، قومی لائحہ عمل پر مشاورت

خلیج اردو
اسلام آباد: (15 مارچ 2025)
وزیراعظم شہباز شریف اور عوامی نیشنل پارٹی کے مرکزی صدر ایمل ولی خان کے درمیان ٹیلیفونک رابطہ ہوا، جس میں بلوچستان اور خیبر پختونخوا کے حالات پر اہم مشاورت کی گئی۔

ایمل ولی خان نے وزیراعظم کو تمام اسٹیک ہولڈرز کے ساتھ مل بیٹھنے کی تجویز دی اور دہشت گردی کے خاتمے کے لیے سیاسی مفادات سے بالاتر ہو کر قومی لائحہ عمل کی ضرورت پر زور دیا۔

وزیراعظم شہباز شریف نے ایمل ولی خان کی تجویز سے اتفاق کرتے ہوئے آئندہ ہفتے کے اندر اہم اجلاس بلانے پر آمادگی ظاہر کی۔

دونوں رہنماؤں نے ملک میں امن و استحکام کے لیے مشترکہ حکمت عملی اپنانے اور دہشت گردی کے خلاف مربوط اور مؤثر اقدامات کے لیے قومی سطح پر مشاورت کرنے کا فیصلہ کیا۔

خیبر پختونخوا اور بلوچستان کے عوام کے تحفظ اور ترقی کے لیے مشترکہ کوششوں پر بھی زور دیا گیا۔