خلیج اردو
العیَن کی سول، کمرشل اور انتظامی دعووں کی عدالت نے ایک خاتون کو حکم دیا ہے کہ وہ مدعیہ کو 1 لاکھ 53 ہزار درہم واپس کرے اور مزید 20 ہزار درہم ہرجانے کے طور پر ادا کرے۔ یہ فیصلہ اس وقت سنایا گیا جب عدالت نے ثابت پایا کہ مذکورہ خاتون نے مدعیہ سے نوکری دلوانے کے وعدے پر رقم وصول کی، لیکن نہ تو ملازمت کا بندوبست کیا اور نہ ہی رقم واپس کی۔
مقامی میڈیا "الخلیج” کی رپورٹ کے مطابق، مدعیہ نے عدالت میں بینک ٹرانسفر کی رسیدیں اور فون پر ہونے والی گفتگو کے اسکرین شاٹس بطور ثبوت پیش کیے، جن سے یہ واضح ہوا کہ رقم براہ راست مدعا علیہہ کو منتقل کی گئی تھی۔ مدعیہ نے عدالت سے مجموعی طور پر 1 لاکھ 53 ہزار درہم کی واپسی اور 47 ہزار درہم بطور ہرجانہ طلب کیے تھے۔
عدالت کی طرف سے مقرر کردہ ماہر نے رپورٹ میں بتایا کہ مدعا علیہہ نے اعتراف کیا کہ اس نے رقم ایک تیسرے شخص کے ذریعے نوکری دلوانے کی غرض سے وصول کی تھی، لیکن جب وہ شخص نوکری کا بندوبست نہ کر سکا، تو مدعا علیہہ نے رقم واپس نہ کی۔ اس نے بعد میں صرف 50 ہزار درہم کی ادائیگی کی پیشکش کی اور باقی رقم کے لیے وقت مانگا، جسے مدعیہ نے مسترد کر دیا۔
شواہد اور ماہر کی رپورٹ کی بنیاد پر عدالت نے مدعا علیہہ کو مکمل رقم واپس کرنے کا حکم دیا اور مدعیہ کو 20 ہزار درہم بطور ہرجانہ دینے کی سزا بھی سنائی۔
