خلیج اردو
شارجہ: ہالینڈ کی کمپنی پال 5 نے شارجہ ریسرچ ٹیکنالوجی اینڈ انوویشن پارک میں دو نشستوں پر مشتمل نئی اُڑنے والی گاڑی متعارف کرا دی ہے جو 250 میٹر کی پٹی سے اُڑان بھرنے کی صلاحیت رکھتی ہے اور 500 کلومیٹر تک سفر کر سکتی ہے۔ گاڑی کی قیمت 8 لاکھ ڈالر (تقریباً 2.9 ملین درہم) رکھی گئی ہے۔
پال 5 کے سی ای او رابرٹ ڈنگیمنسے کے مطابق یہ گاڑی 2027 میں مقامی منظوری کے بعد امارات کی فضاؤں میں نظر آ سکتی ہے۔ گاڑی میں دو افراد اور 20 کلوگرام سامان کی گنجائش ہے اور یہ ایمرجنسی خدمات، بارڈر پیٹرولنگ، کوسٹ گارڈنگ اور فوجی مقاصد میں مددگار ثابت ہو سکتی ہے۔
ڈنگیمنسے نے بتایا کہ جیٹکس نے 100 سے زائد گاڑیاں آرڈر کی ہیں اور مجموعی پری آرڈرز 150 ملین یوروز سے تجاوز کر چکے ہیں۔ گاڑی کا دروازے سے دروازے تک سفر ممکن ہے اور اس کی رفتار اور رینج ہیلی کاپٹر جیسی ہے لیکن یہ محفوظ اور کم خرچ ہے۔
متحدہ عرب امارات میں فلائنگ ٹیکسیز کے لیے پہلے ورٹی پورٹ کا نام ڈی وی ایکس رکھا گیا ہے جبکہ پال فائیو نے مستقبل میں چار نشستوں والی ماڈلز اور ماحول دوست گاڑیاں متعارف کرانے کا بھی عندیہ دیا ہے۔ SRTIP کے سی ای او نے اس ٹیکنالوجی کو پائیدار نقل و حمل کا مستقبل قرار دیا ہے اور شراکت کی پیشکش کی ہے۔
