خلیج اردو
کولمبیا میں 7.4 شدت کے شدید زلزلے سے ہلاکتوں کی تعداد 111 ہوگئی جبکہ 87 افراد زخمی ہوئے ہیں۔ صدر ابیلاردو ڈی لا ایسپریئیلا نے قوم سے خطاب میں ہلاکتوں کی تصدیق کرتے ہوئے بتایا کہ زلزلے کے باعث درجنوں عمارتیں منہدم ہوگئیں۔
امریکی جیولوجیکل سروے کے مطابق زلزلہ مقامی وقت کے مطابق پیر کی صبح آیا، جس کا مرکز بحرالکاہل کے ساحلی صوبے چوکُو کے کم آبادی والے علاقے سان خوسے ڈیل پالمر کے قریب 107 کلومیٹر گہرائی میں تھا۔ شدید زلزلے کے جھٹکے ملک کے بڑے شہروں سمیت وسیع علاقے میں محسوس کیے گئے۔
سب سے زیادہ ہلاکتیں کولمبیا کے کافی پیدا کرنے والے مغربی صوبے ریسارالدا میں رپورٹ ہوئی ہیں، جہاں گورنر خوان ڈیاگو پاتیانو کے مطابق 42 افراد جان سے گئے۔ صوبائی دارالحکومت پریرا میں ایک عمارت کا اگلا حصہ اچانک زمین بوس ہوگیا، جس کے بعد علاقے میں دھول اور ملبے کے بادل چھا گئے۔
زلزلے کے جھٹکوں سے مانی زالیس کے تاریخی گوتھک طرز کے گرجا گھر کے ایک مینار کو بھی نقصان پہنچا اور وہ منہدم ہوگیا۔ کیلی میں اسپتالوں کو بھی خالی کرایا گیا، جہاں نرسیں مریضوں کو بستروں سمیت عمارتوں سے باہر لے آئیں۔
متعدد علاقوں میں عمارتیں گرنے کے بعد شہری اور امدادی کارکن ملبے میں پھنسے افراد کی تلاش میں مصروف ہیں۔ ریسکیو ٹیمیں بھاری مشینری کے ساتھ ساتھ ہاتھوں سے بھی ملبہ ہٹا رہی ہیں، جبکہ زخمیوں کو فوری طبی امداد فراہم کی جا رہی ہے۔
امریکی جیولوجیکل سروے نے خبردار کیا ہے کہ زلزلے کے نتیجے میں بڑے پیمانے پر جانی و مالی نقصان کا امکان ہے۔ حکام کی جانب سے متاثرہ علاقوں میں امدادی کارروائیاں تیز کردی گئی ہیں اور مزید ہلاکتوں کا خدشہ ظاہر کیا جا رہا ہے۔
یہ زلزلہ صدر ابیلاردو ڈی لا ایسپریئیلا کے عہدہ سنبھالنے کے چند ہی روز بعد آیا ہے، جس کے باعث نئی حکومت کو اپنی ابتدائی مدت میں ہی ایک بڑے قدرتی بحران کا سامنا کرنا پڑا ہے۔
