دبئی پولیس کا کریک ڈاؤن، تیز رفتاری سب سے مہلک خطرہ قرار، جانیں اور خاندان برباد ہو رہے ہیں

خلیج اردو
دبئی: دبئی پولیس نے واضح کیا ہے کہ شہر کی سڑکوں پر تیز رفتاری بدستور سب سے جان لیوا خطرہ ہے جو ہر سال قیمتی جانیں نگل لیتا ہے اور کئی خاندانوں کو برباد کر دیتا ہے۔ جنرل ڈپارٹمنٹ آف ٹریفک کے ڈائریکٹر بریگیڈیئر جمعہ سلیم بن سویدان نے کہا ہے کہ پولیس کے اعدادوشمار کے مطابق مہلک حادثات کی سب سے بڑی وجہ تیز رفتاری ہے۔

انہوں نے بتایا کہ یہ لاپرواہی ڈرائیور کو گاڑی پر قابو پانے سے محروم کر دیتی ہے اور کسی بھی خطرے سے بچنے کے لیے بروقت بریک لگانا تقریباً ناممکن ہو جاتا ہے۔ چند سیکنڈ کی کوتاہی پوری فیملی کو اجاڑ سکتی ہے۔

پولیس نے تیز رفتاری کے خلاف کارروائی تیز کرتے ہوئے مزید ریڈار سسٹمز، اسمارٹ پیٹرولز اور جدید مانیٹرنگ ٹیکنالوجی تعینات کر دی ہے۔ ساتھ ہی مختلف آگاہی مہمات بھی شروع کی گئی ہیں تاکہ ڈرائیوروں کو یاد دہانی کرائی جا سکے کہ سڑکیں سب کے لیے ہیں، ریس ٹریک نہیں۔

بریگیڈیئر بن سویدان نے تمام ڈرائیوروں پر زور دیا کہ وہ مقررہ اسپیڈ لمٹ کی پابندی کریں، مناسب فاصلے پر گاڑی چلائیں، اچانک لین نہ بدلیں اور خاص طور پر اسکولوں اور پیدل پار کرنے کی جگہوں کے قریب زیادہ محتاط رہیں۔ ان کا کہنا تھا کہ چند منٹ بچانے کے لیے تیز رفتاری کسی جان کے نقصان کے برابر نہیں ہو سکتی۔