خلیج اردو
دبئی: امارات انٹیگریٹڈ ٹیلی کمیونیکیشن کمپنی (دو) نے پیر کے روز اعلان کیا ہے کہ وہ 342.084 ملین شیئرز فروخت کر رہی ہے جن کی مالیت فی شیئر ایک درہم ہوگی۔ یہ تعداد کمپنی کے کُل اجراء شدہ شیئرز کا 7.54 فیصد بنتی ہے۔
کمپنی نے بتایا کہ یہ شیئرز "مامورا ڈائیورسفائیڈ گلوبل ہولڈنگ” کی جانب سے فروخت کے لیے پیش کیے جا رہے ہیں۔ شیئرز کی قیمت 9 سے 9.90 درہم فی شیئر مقرر کی گئی ہے۔ اس فروخت سے کمپنی 3.078 ارب سے 3.386 ارب درہم تک حاصل کرے گی۔
فی الحال، "امارات انویسٹمنٹ اتھارٹی” کمپنی کے سب سے بڑے حصص دار ہیں جن کے پاس 50.11 فیصد شیئرز ہیں، جبکہ DH 8 ایل ایل سی کے پاس 19.66 فیصد اور مامورا ڈائیورسفائیڈ گلوبل ہولڈنگ کے پاس 10.06 فیصد شیئرز ہیں۔ عوامی حصص داروں میں مقامی اور بین الاقوامی سرمایہ کار شامل ہیں۔
کمپنی نے رواں سال کے پہلے چھ ماہ میں 921 ملین درہم کا منافع ظاہر کیا ہے جو گزشتہ سال کے 801 ملین درہم کے مقابلے میں 15 فیصد زیادہ ہے۔
سبسکرپشن پیریڈ 8 ستمبر سے 12 ستمبر تک جاری رہے گا۔ پہلے مرحلے میں 5 فیصد شیئرز ریٹیل سرمایہ کاروں کے لیے رکھے گئے ہیں جبکہ باقی 95 فیصد ادارہ جاتی سرمایہ کاروں کو دیے جائیں گے۔
شیئرز کے حصول کے لیے کم از کم درخواست کا حجم پہلے مرحلے میں 5,000 درہم جبکہ دوسرے مرحلے میں 5 ملین درہم مقرر کیا گیا ہے۔ سرمایہ کار مختلف بینکوں اور ڈی ایف ایم پلیٹ فارمز کے ذریعے سبسکرپشن کر سکیں گے۔
