خلیج اردو
دبئی: بین الاقوامی ریٹنگ ایجنسی "فچ ریٹنگز” کے مطابق، دبئی میں کرایے کی قیمتیں آئندہ دو برسوں میں دباؤ کا شکار رہیں گی کیونکہ 2025 اور 2026 کے دوران دو لاکھ سے زائد نئے رہائشی یونٹس مارکیٹ میں داخل ہوں گے، جو مقامی پراپرٹی مارکیٹ کی جذب کرنے کی صلاحیت کو آزمائیں گے۔
فچ کے تجزیے میں کہا گیا ہے کہ "2025 کی پہلی سہ ماہی میں تین سالہ تیز رفتار اضافے کے بعد دبئی میں کرایے مستحکم ہونے کے آثار دکھا رہے ہیں۔ ہم سمجھتے ہیں کہ منصوبہ بند بڑی تعداد میں رہائشی یونٹس کے باعث کرایے کی قیمتوں میں کمی آئے گی، جو بالآخر اثاثوں کی قیمتوں پر بھی منفی اثر ڈالے گی۔”
ایجنسی کے مطابق، 2024 کے دوسرے نصف اور 2025 کی پہلی سہ ماہی کے درمیان دبئی میں رہائشی پراپرٹی پر اوسط مجموعی کرایہ دارانہ منافع (رینٹل یِیلڈ) میں تقریباً 30 بیسس پوائنٹس کی کمی آئی، جو اب بھی 7.4 فیصد کی سطح پر ہے اور صحت مند تصور کیا جا رہا ہے۔
تجزیہ کاروں نے کہا کہ اگرچہ 2008 جیسے بڑے مالیاتی بحران جیسا جائیداد کا انہدام متوقع نہیں، لیکن کرایے میں کمی اور سپلائی میں اضافے کی وجہ سے قیمتوں میں معتدل کمی ہو سکتی ہے۔ اس کمی کی شدت کا انحصار اس بات پر ہوگا کہ سرمایہ کار کم منافع کو قبول کرنے پر کتنے آمادہ ہوتے ہیں، اور اگر شرح سود طویل عرصے تک بلند رہی تو یہ کمی زیادہ گہری ہو سکتی ہے۔
2008-09 میں دبئی کی جائیداد مارکیٹ عالمی مالیاتی بحران کی وجہ سے شدید متاثر ہوئی تھی، جب لیہمن برادرز کے بحران نے دنیا بھر کی معیشتوں کو جھٹکا دیا تھا۔
2024 میں 30 ہزار رہائشی یونٹس کی ترسیل کے بعد، آئندہ دو برسوں میں مزید 2.1 لاکھ یونٹس مارکیٹ میں آئیں گے جن میں سے 90,000 یونٹس 2025 اور 120,000 یونٹس 2026 میں متوقع ہیں۔
ایک مقامی رئیل اسٹیٹ کنسلٹنسی کے مطابق، 2025 کی پہلی سہ ماہی میں اپارٹمنٹس کے کرایوں میں اوسط اضافہ صفر فیصد جبکہ ولاز کے کرایوں میں صرف ایک فیصد رہا، جو گزشتہ رجحانات کے مقابلے میں نمایاں کمی ہے۔ تاہم، سال بہ سال بنیاد پر کرایے میں 9 فیصد (اپارٹمنٹس) اور 7 فیصد (ولاز) اضافہ ریکارڈ کیا گیا، جو مانگ میں تسلسل کی علامت ہے۔
رپورٹ کے مطابق کچھ علاقوں میں کرایے میں اضافہ جاری ہے، خاص طور پر ان علاقوں میں جہاں نئی سپلائی محدود ہو یا اعلیٰ معیار کی رہائش متعارف کروائی گئی ہو۔ اس کے برعکس، وہ علاقے جہاں نئے یونٹس کی فراہمی میں اضافہ ہوا ہے، وہاں قیمتوں میں اعتدال آیا ہے، کیونکہ رہائشی افراد اب زیادہ سستی رہائش کو ترجیح دے رہے ہیں۔
دبئی لینڈ ڈیپارٹمنٹ کی جانب سے 2025 کے اوائل میں متعارف کروایا گیا "سمارٹ رینٹل انڈیکس” کرایوں میں استحکام کے فروغ میں اہم کردار ادا کر رہا ہے۔
رئیل اسٹیٹ فرم "ایستیکو” نے آئندہ کرایہ داری کے رجحانات میں مزید تبدیلیوں کی پیش گوئی کی ہے۔ رپورٹ کے مطابق، "اگرچہ کچھ پرانے اور مکمل ترقی یافتہ علاقوں میں سپلائی کی کمی ہے، لیکن مجموعی مارکیٹ تیزی سے وسعت پا رہی ہے، اور آنے والے وقت میں بڑھتی ہوئی فراہمی کرایوں کو متوازن کر کے رہائشیوں کو بہتر متبادل فراہم کرے گی۔
