خلیج اردو
انٹرنیشنل ایسٹرونومیکل سینٹر (IAC) کے مطابق، اسلامی مہینے ذوالحجہ کا آغاز ممکنہ طور پر پیر 27 مئی کو چاند نظر آنے سے ہوگا، جس کے تحت عید الاضحیٰ جمعہ 6 جون کو منائے جانے کا قوی امکان ہے۔
مرکز کے ڈائریکٹر انجینئر محمد شوقت عودہ نے کہا ہے کہ "چاند 27 مئی کو وسطی و مغربی ایشیا، بیشتر افریقی اور یورپی علاقوں میں دوربین کے ذریعے دیکھا جا سکے گا، جبکہ امریکہ کے کئی حصوں میں بغیر دوربین کے بھی نظر آنے کے امکانات موجود ہیں۔”
چار روزہ تعطیلات
اگر چاند 27 مئی کو نظر آ گیا، تو عرفات کا دن جمعرات 5 جون اور عید الاضحیٰ جمعہ 6 جون کو ہوگی۔ بصورت دیگر اگر چاند 27 کو نظر نہ آیا تو ذوالحجہ 29 مئی سے شروع ہوگا، اور یوں عرفات 6 جون اور عید الاضحیٰ ہفتہ 7 جون کو منائی جائے گی۔
متحدہ عرب امارات کی کابینہ کے فیصلے کے مطابق عرفہ کے دن اور اس کے بعد عید کے تین دنوں (10 تا 12 ذوالحجہ) کی عام تعطیلات ہوں گی۔ اس طرح رہائشیوں کو یا تو 5 سے 8 جون یا 6 سے 9 جون تک، اختتام ہفتہ سمیت، چار دن کی چھٹی ملے گی۔
فلکیاتی حسابات
اماراتی ماہر فلکیات اور عرب یونین برائے فلکیات و خلائی سائنسز کے رکن، ابراہیم الجروان نے بھی کہا ہے کہ ذوالحجہ کا پہلا دن بدھ 28 مئی کو متوقع ہے۔
انٹرنیشنل ایسٹرونومیکل سینٹر کے حساب سے ابو ظبی میں چاند غروب آفتاب کے 38 منٹ بعد غروب ہوگا، جب اس کی عمر 13 گھنٹے 29 منٹ ہوگی، اور وہ سورج سے 7.7 ڈگری کے فاصلے پر ہوگا، جس سے وہ صرف دوربین سے دکھائی دے گا۔ مکہ مکرمہ میں یہی چاند غروب آفتاب کے 39 منٹ بعد غروب ہوگا، اور اس کی عمر 14 گھنٹے 17 منٹ ہوگی، سورج سے فاصلہ 8.1 ڈگری ہوگا۔
ماہرین کے مطابق چاند کی عمر اور غروب آفتاب کے بعد دورانیہ اس کی رؤیت کا واحد معیار نہیں ہوتے بلکہ سورج سے زاویائی فاصلہ اور افق سے بلندی بھی اہم عوامل میں شامل ہیں۔
اسلامی کیلنڈر قمری نظام پر مبنی ہے، اور ہر مہینہ نئے چاند کی رؤیت پر منحصر ہوتا ہے۔
