ابوظبی میں جعلی پراپرٹی لسٹنگز کا خاتمہ، مدھمون سسٹم سے شفافیت میں اضافہ

خلیج اردو
ابوظبی: برسوں سے گھروں کی تلاش کرنے والے افراد جعلی یا غیر حقیقی پراپرٹی لسٹنگز سے پریشان تھے، لیکن اب ابوظبی ریئل اسٹیٹ سینٹر (ADREC) کے نئے اقدام "مدھمون” نے یہ مسئلہ بڑی حد تک ختم کر دیا ہے۔ اس سسٹم کے نفاذ کے بعد پراپرٹی فائنڈر، بایوت اور دوبزل جیسے بڑے پورٹلز سے 90 فیصد کے قریب غیر مصدقہ اشتہارات ہٹا دیے گئے ہیں۔

رپورٹ کے مطابق 15 اگست سے پہلے ان پورٹلز پر تقریباً 75 ہزار پراپرٹی لسٹنگز موجود تھیں جو مدھمون کے بعد کم ہو کر صرف 20 ہزار رہ گئی ہیں۔ اب ہر اشتہار کے لیے DARI پلیٹ فارم کے ذریعے مالک کی اجازت کے ساتھ ایک سرکاری پرمٹ لازمی ہے اور ایک یونٹ کو زیادہ سے زیادہ تین بروکرز تک محدود کیا گیا ہے۔ اس سے جعلی اشتہارات، غلط قیمتوں اور ڈپلیکیشن کا خاتمہ ہوا ہے۔

پراپرٹی مالکان اور خریداروں نے اس اقدام کا خیرمقدم کیا ہے۔ ان کا کہنا ہے کہ اب وقت ضائع نہیں ہوتا کیونکہ آن لائن جو لسٹنگ نظر آتی ہے وہ حقیقت میں دستیاب ہوتی ہے۔ سرمایہ کاروں کے مطابق اس سے مارکیٹ زیادہ شفاف اور قابلِ اعتماد ہو گئی ہے۔

پراپرٹی پورٹلز نے بھی اس اقدام کو مثبت قرار دیا ہے اور کہا ہے کہ اب فروخت کنندگان اور کرایہ داروں کی پراپرٹی زیادہ نمایاں اور معتبر نظر آئے گی۔ تاہم بروکرز اور مالکان نے پرمٹ فیس اور ذاتی معلومات کے انکشاف پر تحفظات ظاہر کیے ہیں۔ کرایہ پر دینے کے پرمٹس 50 سے 115 درہم فی سہ ماہی، جبکہ فروخت کے پرمٹس 125 سے 250 درہم فی سہ ماہی لاگت رکھتے ہیں۔ آف پلان منصوبوں کے لیے فی بروکر 25 ہزار درہم فی تین ماہ فیس مقرر کی گئی ہے، جسے کچھ ماہرین نے مہنگا قرار دیا۔

21 اگست سے یہ نظام ابوظبی گلوبل مارکیٹ (ADGM) تک بھی پھیلایا گیا ہے، جہاں اب ہر اشتہار کے لیے علیحدہ پرمٹ درکار ہے۔ ماہرین کے مطابق یہ صرف شروعات ہے اور مستقبل میں ابوظبی کو خطے کی بہترین ریگولیٹڈ ریئل اسٹیٹ مارکیٹ بنانے کے لیے مزید اقدامات متعارف کرائے جائیں گے۔