خلیج اردو
دبئی کے معروف ملٹی کلچرل فیملی ڈیسٹینیشن گلوبل ولیج نے سیزن 31 سے قبل فوڈ اینڈ بیوریج کاروباروں کے لیے رجسٹریشن کھول دی ہے۔ اس اقدام کے تحت نئے فوڈ کانسیپٹس، آزاد برانڈز اور پہلے سے کام کرنے والے کاروباروں کو لاکھوں مقامی و غیر ملکی زائرین کے سامنے اپنے برانڈز متعارف کرانے کا موقع ملے گا۔

گلوبل ولیج میں فوڈ اینڈ بیوریج کاروباروں کے لیے دو کیٹیگریز میں درخواستیں وصول کی جا رہی ہیں۔ ریسٹورنٹس اور کافی شاپس کے لیے رجسٹریشن 7 اگست سے 18 اگست تک جاری رہے گی جبکہ کیوسکس اور فوڈ ٹرالیوں کے لیے درخواستیں 13 اگست سے 26 اگست تک جمع کرائی جا سکیں گی۔

دونوں کیٹیگریز میں پہلی بار درخواست دینے والے کاروباروں کے ساتھ تجربہ کار آپریٹرز بھی رجسٹریشن کرا سکتے ہیں۔

منتخب کاروباری شراکت داروں کو گلوبل ولیج کی جانب سے مکمل معاونت فراہم کی جائے گی جس میں حسب ضرورت سیٹ اپ، اسٹاف ویزا میں معاونت، درآمدی اشیا کے کسٹمز کے معاملات، اسٹوریج کی سہولت اور الیکٹرانک پیمنٹ ٹرمینلز تک رسائی شامل ہے۔

سیزن کے دوران کاروباری افراد کو آپریشنل رہنمائی بھی فراہم کی جائے گی تاکہ بڑے پیمانے پر ایونٹ میں کام کرنے کا سابقہ تجربہ نہ رکھنے والے کاروبار بھی مؤثر انداز میں اپنی سرگرمیاں جاری رکھ سکیں۔

گلوبل ولیج پہلے بھی فوڈ اینڈ بیوریج کاروباروں کے لیے ایک اہم پلیٹ فارم ثابت ہوا ہے۔ سیزن 30 میں 90 سے زائد ثقافتوں کے ذائقوں پر مشتمل 250 سے زیادہ ڈائننگ آؤٹ لیٹس شامل تھے جبکہ متعدد چھوٹے کاروبار یہاں سے اپنی برانڈ ویلیو بڑھانے میں کامیاب ہوئے۔

گلوبل ولیج 1997 میں آغاز کے بعد سے اب تک 100 ملین سے زائد مہمانوں کا استقبال کر چکا ہے۔ سیزن 30 میں 3 ہزار 500 سے زائد شاپنگ آؤٹ لیٹس، 40 ہزار 500 شوز میں 450 عالمی معیار کے فنکار اور کارنیوال میں 200 سے زائد رائیڈز اور گیمز شامل تھیں۔

سیزن 31 میں بھی بڑے پیمانے پر سرگرمیوں کی توقع کی جا رہی ہے جس کے باعث فوڈ اینڈ بیوریج کاروباروں کے لیے مقامی اور غیر ملکی سیاحوں پر مشتمل بڑی اور متنوع مارکیٹ تک رسائی کا اہم موقع پیدا ہوگا۔

دلچسپی رکھنے والے کاروبار گلوبل ولیج کے بزنس پورٹل کے ذریعے اپنی تجاویز جمع کرا سکتے ہیں۔ سیزن 31 کے افتتاح سمیت مزید تفصیلات آنے والے ہفتوں میں جاری کی جائیں گی۔