خلیج اردو
متحدہ عرب امارات کے ماہر ڈاکٹر کے مطابق روزانہ کافی پینا دل کی صحت کے لیے فائدہ مند ہوسکتا ہے لیکن اس کے لیے کافی پینے کے طریقے اور مقدار کا خیال رکھنا ضروری ہے۔

فیملی میڈیسن اور آکیوپیشنل ہیلتھ کے کنسلٹنٹ ڈاکٹر منصور انور حبیب کے مطابق کافی کے دانوں میں اینٹی آکسیڈنٹس پائے جاتے ہیں جو قلبی نظام کے لیے مختلف حفاظتی فوائد رکھتے ہیں۔

امریکن ہارٹ ایسوسی ایشن کی حالیہ تحقیق کے حوالے سے ڈاکٹر حبیب نے بتایا کہ باقاعدگی سے کافی پینے کا تعلق انسولین ریزسٹنس میں کمی، شریانوں میں خون کے لوتھڑے بننے کے خطرے میں کمی، شریانوں کی دیواروں کے تحفظ اور جسم میں اندرونی سوزش کم ہونے سے ہے۔

تاہم ڈاکٹر حبیب کے مطابق کافی کے یہ فوائد اس وقت حاصل ہوسکتے ہیں جب تین اہم اصولوں پر عمل کیا جائے۔

پہلی شرط: مقدار

ڈاکٹر حبیب کے مطابق روزانہ ایک سے پانچ کپ کافی تک استعمال کیا جاسکتا ہے جبکہ پانچ کپ کو زیادہ سے زیادہ حد سمجھا جانا چاہیے۔ تحقیق میں دل کی ناکامی، فالج اور کورونری بیماری کے کم خطرے جیسے فوائد اسی حد کے اندر دیکھے گئے ہیں۔

پانچ کپ سے زیادہ کافی پینے سے یہ توازن متاثر ہوسکتا ہے اور قلبی فوائد کم ہونے لگتے ہیں۔

دوسری شرط: پیپر فلٹر کا استعمال

ڈاکٹر حبیب کے مطابق کافی کو پیپر فلٹر کے ذریعے تیار کرنا زیادہ بہتر ہے جبکہ دھات کے فلٹر یا ابال کر تیار کی گئی کافی کو میڈیکل اعتبار سے اَن فلٹرڈ کافی سمجھا جاتا ہے۔

اس کی وجہ کافی میں موجود کیفیسٹول نامی مرکب ہے جو کافی کے قدرتی تیل میں پایا جاتا ہے۔ ابالی ہوئی یا میٹل فلٹر سے تیار کی گئی کافی میں کیفیسٹول کپ تک پہنچ سکتا ہے اور خون میں نقصان دہ ایل ڈی ایل کولیسٹرول کی سطح بڑھا سکتا ہے۔

پیپر فلٹر کیفیسٹول کو کافی میں شامل ہونے سے روک دیتا ہے۔

اسی لیے ترک کافی، عربی کافی، فرنچ پریس اور موکا پاٹ سے تیار کی جانے والی کافی کو اَن فلٹرڈ کافی میں شمار کیا جاتا ہے۔ جن افراد کا ایل ڈی ایل کولیسٹرول پہلے ہی زیادہ ہو انہیں ان طریقوں کے بجائے پیپر فلٹر سے تیار کی گئی کافی کو ترجیح دینے کا مشورہ دیا گیا ہے۔

ڈِرِپ کافی مشین، V60 اور Chemex جیسے پیپر فلٹر والے طریقے زیادہ موزوں قرار دیے گئے ہیں۔

تیسری شرط: کافی بلیک ہو

ڈاکٹر حبیب کے مطابق کافی کے ممکنہ قلبی فوائد حاصل کرنے کے لیے اسے بلیک یعنی بغیر چینی اور دیگر اضافی اجزا کے پینا چاہیے۔

چینی خون میں گلوکوز کی سطح بڑھا سکتی ہے جبکہ دودھ اور کریم اضافی کیلوریز اور سیچوریٹڈ فیٹس فراہم کرتے ہیں جو کافی کے ممکنہ قلبی فوائد کو کم کرسکتے ہیں۔

ماہرین کے مطابق کافی اور دل کی صحت کے حوالے سے ہونے والی تحقیق میں زیادہ تر سادہ بلیک کافی کے استعمال کو مدنظر رکھا گیا ہے نہ کہ زیادہ چینی، دودھ، کریم یا فلیورڈ سیرپس والی کافی کو۔

کن افراد کو احتیاط کرنی چاہیے؟

ڈاکٹر حبیب کے مطابق شدید یا بے قابو ہائی بلڈ پریشر کے مریض کافی کے استعمال میں احتیاط کریں کیونکہ کیفین مختصر مدت کے لیے بلڈ پریشر بڑھا سکتی ہے۔

جن افراد کا ایل ڈی ایل کولیسٹرول پہلے ہی زیادہ ہے انہیں پیپر فلٹر والی کافی استعمال کرنے کو ترجیح دینی چاہیے۔

دل کے کسی مرض میں مبتلا افراد کو اپنی روزانہ کافی کی مقدار یا طریقہ تبدیل کرنے سے پہلے اپنے ڈاکٹر سے مشورہ کرنا چاہیے۔