خلیج اردو
امریکی خبر رساں ویب سائٹ Axios نے دو امریکی حکام کے حوالے سے دعویٰ کیا ہے کہ ایران کی پاسدارانِ انقلاب نے پیر کی شب آبنائے ہرمز سے گزرنے والے کم از کم دو تجارتی جہازوں پر میزائل داغے۔
رپورٹ کے مطابق میزائل حملوں کے نتیجے میں دونوں تجارتی جہازوں کو شدید نقصان پہنچا، تاہم کسی جانی نقصان کی اطلاع نہیں ملی۔
رپورٹ میں ایک امریکی عہدیدار کے حوالے سے کہا گیا ہے کہ حملہ آبنائے ہرمز میں بین الاقوامی بحری گزرگاہ سے گزرنے والے تجارتی جہازوں کو نشانہ بنا کر کیا گیا۔
ایرانی حکام کی جانب سے اس دعوے پر فوری طور پر کوئی باضابطہ ردعمل سامنے نہیں آیا، جبکہ اس واقعے کی آزاد ذرائع سے بھی فوری تصدیق نہیں ہو سکی۔
آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں سے عالمی تیل کی ترسیل کا بڑا حصہ گزرتا ہے، اس لیے اس علاقے میں کسی بھی قسم کی کشیدگی عالمی توانائی منڈیوں اور بحری تجارت پر اثرانداز ہو سکتی ہے۔
