ایران کا موقف: امریکا سے کبھی جنگ بندی کی درخواست نہیں کی، خطے میں مستحکم اور مضبوط، مذاکرات کا اچھا تجربہ نہیں

خلیج اردو
ایرانی وزیر خارجہ عباس عراقچی نے کہا ہے کہ ایران نے کبھی امریکا سے جنگ بندی کی درخواست نہیں کی اور جب تک ضرورت پڑے اپنے دفاع کے لیے تیار رہیں گے۔ عراقچی نے مزید کہا کہ ایران پہلے سے زیادہ مستحکم اور مضبوط ہے، اور اس وقت لڑائی جاری رہے گی جب تک امریکی صدر ڈونلڈ ٹرمپ نہیں مان لیتے کہ یہ جنگ غیر قانونی ہے۔

عراقچی نے بتایا کہ جب ایران مذاکرات کی کوشش کر رہا تھا تو امریکا نے حملہ کر دیا، اور اس لیے امریکا کے ساتھ بات چیت کا کوئی اچھا تجربہ نہیں ہوا۔

ایرانی وزیر خارجہ نے عرب ممالک میں شہری اہداف کو نشانہ بنانے کی تردید کرتے ہوئے مشترکہ تحقیقاتی کمیٹی بنانے کی پیشکش کی۔ انہوں نے کہا کہ بعض کارروائیوں میں اسرائیل ملوث ہو سکتا ہے۔

پاسداران انقلاب نے کہا کہ اگر ایرانی بحریہ ختم ہو چکی تو ٹرمپ ہمت دکھائیں۔ خلیج فارس میں امریکی نیوی کی موجودگی پر بات کرتے ہوئے عراقچی نے کہا کہ ابھی وہ میزائل استعمال نہیں ہوئے جو 2025 میں تیار کیے گئے تھے۔

ایران کی یہ وضاحتیں اس بات کی عکاسی کرتی ہیں کہ تہران خطے میں کشیدگی کے دوران دفاع اور مذاکرات دونوں پر زور دے رہا ہے، اور خطے میں جاری کشیدگی کو اپنے مؤقف سے جوڑ کر پیش کر رہا ہے۔