فجیرہ: گرمیوں میں بچوں کے لیے مفت تیراکی اور کائیکنگ کی تربیت، "سمر اسپلش” مہم کے تحت بھرپور شرکت

خلیج اردو
فجیرہ: متحدہ عرب امارات کی شدید گرمیوں میں جہاں عام طور پر آبی سرگرمیاں سرد موسم تک مؤخر کی جاتی ہیں، وہیں فجیرہ کے بچے اس گرمی کو فائدے میں بدلتے ہوئے پانی سے لطف اندوز ہو رہے ہیں۔ سات سال کی عمر سے لے کر سولہ سال تک کے بچوں کے لیے فجیرہ میں مفت تیراکی اور کائیکنگ کی تربیت فراہم کی جا رہی ہے۔

یہ سرگرمیاں "فجیرہ سمر” مہم کا حصہ ہیں، جو 25 جون کو "سمر اسپلش” کے عنوان سے شروع کی گئی اور 21 جولائی 2025 تک جاری رہے گی۔

ولی عہد کی ہدایت پر انعقاد

یہ پروگرام فجیرہ کے ولی عہد، شیخ محمد بن حمد الشرقی کی ہدایات پر شروع کیا گیا، جس کا مقصد بچوں میں زندگی کی بنیادی مہارتوں کو فروغ دینا، صحت مند طرزِ زندگی اپنانا، اور مستند ماہرین کی نگرانی میں منظم کھیلوں کی تربیت فراہم کرنا ہے۔

جسمانی کھیلوں کے ساتھ تعلیمی سرگرمیاں بھی

فجیرہ انٹرنیشنل میرین کلب کی جانب سے اس سمر بیچ پروگرام کے تحت نہ صرف کائیکنگ، تیراکی اور پاور بوٹنگ جیسی جسمانی سرگرمیاں کروائی جا رہی ہیں بلکہ شرکاء کو سمندری ماحولیاتی تحفظ سے متعلق آگاہی سیشنز بھی دیے جا رہے ہیں۔

اب تک 75 بچے اس پروگرام میں حصہ لے چکے ہیں، جن میں لڑکے اور لڑکیاں دونوں شامل ہیں۔ کیمپ ہر روز شام 5 بجے سے 7 بجے تک منعقد ہوتا ہے، تاہم ہفتہ اور اتوار کو تعطیل ہوتی ہے۔

معاشرے میں سرگرم اور باخبر طرزِ زندگی کو فروغ دینا مقصد

فجیرہ انٹرنیشنل میرین کلب کے مطابق اس مہم کا مقصد نوجوان نسل میں ذمہ دارانہ طرزِ زندگی، صحت مند عادات اور سمندری کھیلوں کے ذریعے خود اعتمادی اور صلاحیتوں کو اجاگر کرنا ہے، تاکہ نوجوان نہ صرف جسمانی طور پر فعال ہوں بلکہ معاشرتی طور پر باشعور بھی بن سکیں۔