یو ایس اوپن میں میڈویڈیف کے غصے پر بیکر کا ردعمل: "پروفیشنل مدد کی ضرورت ہے”

خلیج اردو
نیویارک: جرمن ٹینس لیجنڈ بورس بیکر کا کہنا ہے کہ روسی کھلاڑی دانیل میڈویڈیف کو یو ایس اوپن میں ایک اور "میلت ڈاؤن” کے بعد پیشہ ورانہ مدد لینے کی ضرورت ہے۔

اتوار کو فرانس کے بینجامن بونزی کے خلاف پانچ سیٹ کے سنسنی خیز مقابلے میں میڈویڈیف شدید جذباتی انداز میں چیئر امپائر پر برس پڑے اور تماشائیوں کو بھی بھڑکانے کی کوشش کی، جس سے کھیل کئی منٹ رکا رہا۔ بالآخر وہ 6-3، 7-5، 6-7، 0-6 اور 6-4 سے شکست کھا گئے۔

میچ کے دوران امپائر کے فیصلے پر شدید احتجاج کرتے ہوئے میڈویڈیف نے کہا: "کیا آپ آدمی ہیں؟ وہ کھیل ختم کرنا چاہتا ہے کیونکہ اسے یہاں رہنا اچھا نہیں لگتا۔” شکست کے بعد انہوں نے اپنا ریکٹ زمین پر توڑ ڈالا۔

بیکر نے سوشل میڈیا پر ردعمل دیتے ہوئے کہا: "ہم اسے پبلک میلت ڈاؤن کہتے ہیں۔ میرا خیال ہے کہ اسے پروفیشنل مدد کی ضرورت ہے۔”

امریکی کوچ بریڈ گلبیرٹ نے بھی اس سے اتفاق کرتے ہوئے کہا کہ "میڈویڈیف کا دماغ اس پر غالب آ رہا ہے۔” سابق ڈیوس کپ کپتان پیٹرک مک اینرو نے مشورہ دیا کہ روسی کھلاڑی کو باقی سال کھیل سے وقفہ لینا چاہیے۔

میڈویڈیف اپنے کیریئر کے دوران کئی بار اس طرح کے رویوں کے باعث جرمانے بھگت چکے ہیں۔ 2019 یو ایس اوپن اور 2022 آسٹریلین اوپن میں بھی وہ امپائرز اور تماشائیوں سے الجھ چکے ہیں۔