خلیج اردو
عمان نے صلالہ میں پیش آنے والے جان لیوا حادثے کے بعد تمام منظور شدہ مقامات پر پیراگلائیڈنگ کی سرگرمیاں عارضی طور پر معطل کر دی ہیں۔
عمانی ایئر اسپورٹس کمیٹی (OASC) نے اعلان کیا کہ پابندی فوری طور پر نافذ ہوگی اور آئندہ اطلاع تک برقرار رہے گی۔
یہ فیصلہ دھوفر گورنریٹ میں پیش آنے والے حادثے کے بعد کیا گیا جس میں پیراگلائیڈنگ کپتان احمد بن حمدان الکلبانی اور ان کی بہن جاں بحق ہو گئے۔
کمیٹی نے سوشل میڈیا پر کپتان احمد الکلبانی کی تصاویر شیئر کرتے ہوئے ان کے انتقال پر افسوس کا اظہار کیا اور بتایا کہ دونوں پیراگلائیڈر سے گرنے کے باعث جان کی بازی ہار گئے۔
حادثے کی مزید تفصیلات فوری طور پر جاری نہیں کی گئیں۔
عمانی ایئر اسپورٹس کمیٹی نے جاں بحق افراد کے اہل خانہ سے تعزیت کی جبکہ سوشل میڈیا صارفین نے بھی دعاؤں اور تعزیتی پیغامات کا اظہار کیا۔
دھو فر کا خریف سیزن عمان کے مشہور سیاحتی اوقات میں شمار ہوتا ہے جہاں ہر سال بڑی تعداد میں سیاح آتے ہیں۔ اس دوران پیراگلائیڈنگ، ہائیکنگ، وادیوں کی سیر اور کیمپنگ جیسی سرگرمیاں مقبول ہوتی ہیں، تاہم بارش اور دھند کے باعث موسمی حالات بعض اوقات مشکلات پیدا کر سکتے ہیں۔
