خلیج اردو
یو اے ای کی فیڈرل اتھارٹی برائے آئیڈنٹیٹی، سٹیزن شپ، کسٹمز اینڈ پورٹ سکیورٹی (ICP) نے شہریوں کے لیے ایک بڑا انتظامی سہولت پیکج متعارف کرایا ہے، جس کے تحت پاسپورٹ اور امارات آئی ڈی کی تجدید اب ایک ہی مرحلے میں مکمل کی جا سکے گی۔ اس نئے سسٹم کے بعد شہریوں کو دونوں دستاویزات کی الگ تجدید کرنے یا ان کی مدتِ میعاد کو ہم آہنگ رکھنے کی مشکل کا سامنا نہیں کرنا پڑے گا۔
یہ سہولت حکومت کے “زیرو بیورکریسی” پروگرام کا حصہ ہے، جس کا مقصد سرکاری عمل کو آسان بنانا اور شہریوں کے وقت اور محنت کی بچت کرنا ہے۔ یو اے ای آئی سی پی اسمارٹ ایپ کے ذریعے شہری پاسپورٹ اور امارات آئی ڈی کی بیک وقت تجدید کر سکیں گے، وہ بھی ایک ہی درخواست میں۔
حکام کے مطابق یہ نیا نظام عوامی آراء کی روشنی میں تیار کیا گیا، جو “زیرو بیورکریسی ایکسپو” کے دوران سامنے آئیں۔ شہریوں نے سب سے بڑی مشکل یہ بتائی تھی کہ پاسپورٹ اور امارات آئی ڈی کی مختلف تاریخِ تنسیخ ہونے کی وجہ سے ان کی تجدید کے عمل میں الجھن پیدا ہوتی ہے۔
نئے سسٹم میں اگر شہری کا پاسپورٹ ایکسپائر ہو چکا ہو اور اس کی امارات آئی ڈی 6 ماہ کے اندر ایکسپائر ہونے والی ہو، تو ایپ دونوں دستاویزات کی مشترکہ تجدید کا آپشن خودکار طور پر فراہم کرے گی۔
اس سے قبل دونوں دستاویزات کی تجدید کے لیے الگ الگ فارم، مختلف فیسوں اور متعدد کارروائیوں سے گزرنا پڑتا تھا۔ اب ایپ ایک ہی پیج پر تمام مراحل مکمل کرنے کی سہولت دیتی ہے، جس میں ذاتی معلومات کی تصدیق سے لے کر درخواست جمع کرانے تک تمام مرحلے یکجا کر دیے گئے ہیں۔
یو اے ای آئی سی پی ایپ شہریوں کو اپنے پورے خاندان کے پاسپورٹس اور شناختی دستاویزات بھی ایک ہی پلیٹ فارم سے منظم کرنے کی سہولت دیتی ہے، جس سے یہ سسٹم نہایت مؤثر اور صارف دوست بن گیا ہے۔
حکام کا کہنا ہے کہ یہ سہولت ایک بنیادی سروس سے بڑھ کر ایک اسمارٹ اور جامع ڈیجیٹل حل بن چکی ہے، جو براہ راست شہریوں کی تجاویز کی بنیاد پر تیار کیا گیا ہے۔ یہ اقدام “زیرو بیورکریسی” کے قومی وژن کی شاندار مثال ہے، جس کا مقصد سرکاری نظام کو زیادہ موثر، تیز اور جدید خطوط پر استوار کرنا ہے۔
