خلیج اردو
شارجہ کرکٹ اسٹیڈیم میں پیر کے روز کھیلے گئے ٹرائی سیریز کے میچ میں افغانستان کی ٹیم نے میزبان یو اے ای کو 38 رنز سے شکست دے کر اپنی پہلی کامیابی حاصل کی۔ میچ سے قبل دونوں ٹیموں کے کھلاڑیوں نے افغانستان میں زلزلے سے جاں بحق ہونے والے 800 سے زائد افراد کی یاد میں ایک منٹ کی خاموشی اختیار کی، جو ایک نہایت جذباتی لمحہ تھا۔
افغان ٹیم نے ٹاس کے بعد پہلے کھیلتے ہوئے مقررہ 20 اوورز میں چار وکٹوں پر 188 رنز بنائے۔ ابراہیم زدران نے 40 گیندوں پر 63 رنز اور صدیق اللہ اتل نے 40 گیندوں پر 54 رنز کی شاندار نصف سنچریاں اسکور کیں۔ آخر میں کریم جنت نے 10 گیندوں پر 23 اور عظمت اللہ عمرزئی نے 12 گیندوں پر 20 رنز بنا کر مجموعے کو مزید مستحکم کیا۔
جواب میں یو اے ای کی ٹیم مقررہ اوورز میں آٹھ وکٹوں پر 150 رنز بنا سکی۔ کپتان محمد وسیم نے 37 گیندوں پر 67 اور راہول چوپڑا نے 35 گیندوں پر ناقابل شکست 52 رنز بنائے، تاہم دیگر بلے باز خاطر خواہ کارکردگی نہ دکھا سکے۔ افغانستان کے کپتان راشد خان نے 21 رنز دے کر تین اور شرف الدین اشرف نے 24 رنز دے کر تین وکٹیں حاصل کیں۔
یہ افغانستان کی اس ٹرائی سیریز میں پہلی کامیابی تھی، جبکہ یو اے ای کو مسلسل دوسری شکست کا سامنا کرنا پڑا۔ اس سے قبل ہفتے کو پاکستان نے بھی یو اے ای کو ہرایا تھا۔ پوائنٹس ٹیبل پر پاکستان دو میچ جیت کر سرفہرست ہے اور منگل کو افغانستان کے خلاف میدان میں اترے گا۔
یہ ٹی ٹوئنٹی ٹرائی سیریز ایشیا کپ (9 تا 28 ستمبر، دبئی اور ابوظہبی) سے قبل ایک اہم وارم اپ ایونٹ تصور کی جا رہی ہے۔
