دبئی میں دیوالی کے دوران سونے کے سکوں کی مانگ میں ریکارڈ اضافہ، بعض دکانوں پر اسٹاک ختم

خلیج اردو
دبئی: دیوالی کے موقع پر دبئی اور متحدہ عرب امارات میں سونے کے سکوں کی غیر معمولی طلب نے مارکیٹ میں مختصر مدت کے لیے قلت پیدا کر دی۔ زیورات فروشوں کے مطابق، رواں سال سونے کی قیمتوں میں 50 فیصد سے زائد اضافہ ہونے کے باوجود صارفین کی دلچسپی کم نہیں ہوئی بلکہ تحفے کے طور پر چھوٹے سائز کے سونے کے سکے خریدنے کا رجحان پچھلے سال کی نسبت کہیں زیادہ رہا۔

*مینا جیولرز* کے پارٹنر سنجے جیتوانی نے بتایا کہ "دیوالی سے چند روز قبل خریداروں کا رش بہت بڑھ گیا تھا، خاص طور پر پانچ اور دس گرام کے سکوں کی فروخت توقع سے زیادہ رہی جس کے باعث عارضی طور پر ان کا اسٹاک ختم ہوگیا۔ تاہم بڑی مالیت کے سکے اور سونے کی اینٹیں وافر مقدار میں دستیاب رہیں۔”

ان کے مطابق رواں سال لوگوں کا رجحان واضح طور پر سونے میں بطور محفوظ سرمایہ کاری کے اظہار کا عکاس ہے۔ "ہمیں توقع ہے کہ شادیوں اور سال کے اختتامی سیزن میں یہ رجحان مزید بڑھے گا۔”

مینا جیولرز کے دوسرے پارٹنر وِنَے جیتوانی نے کہا کہ دیوالی کے دوران سونے کے سکوں کی مانگ میں غیر معمولی اضافہ ہوا۔ "لوگ نہ صرف زیورات بلکہ مختلف وزن کے سکے بھی خوش بختی اور تحفے کے طور پر خرید رہے تھے، جس کی وجہ سے پچھلے سال کی نسبت طلب کئی گنا زیادہ رہی۔”

اسی طرح *سیرویا جیولرز* کے مالک چندو سیرویا کے مطابق، پانچ اور دس گرام کے سوئس ساختہ سونے کی سلاخوں کی سپلائی وقتی طور پر کم ہو گئی تھی۔ "دیوالی کے دوران سرمایہ کاری کے طور پر سونا خریدنے کا رجحان بہت زیادہ بڑھ گیا کیونکہ لوگوں کو توقع ہے کہ آنے والے مہینوں میں سونے کی قیمت 5000 ڈالر فی اونس سے تجاوز کر سکتی ہے۔”

*بافلہ جیولرز* کے منیجنگ ڈائریکٹر چراغ وورا نے بھی تصدیق کی کہ صارفین اس سال زیورات کے بجائے سونے کے سکوں کو زیادہ ترجیح دے رہے ہیں۔ ان کے مطابق، خریداروں نے مہنگائی کے باعث سادہ اور کم وزن والے سکے خریدنے کو ترجیح دی تاکہ میکنگ چارجز سے بچا جا سکے۔

دوسری جانب *ملابار گولڈ اینڈ ڈائمنڈز* کے منیجنگ ڈائریکٹر شملال احمد نے کہا کہ کمپنی نے دیوالی اور دھن تریاس کے موقع پر بڑھتی طلب کا پہلے سے اندازہ لگا لیا تھا، اس لیے صارفین کو کسی کمی کا سامنا نہیں کرنا پڑا۔

*کنز جیولز* کے منیجنگ ڈائریکٹر انیل دھنک کے مطابق مارکیٹ میں سونے کے سکوں کی قلت نہیں، بلکہ 24 قیراط کی بڑی سرمایہ کاری والی سلاخوں (50 اور 100 گرام) کی عارضی کمی دیکھی گئی ہے۔ انہوں نے کہا کہ 22 قیراط کے روایتی گول سکے اب بھی مناسب مقدار میں دستیاب ہیں۔

Gold coin demand surges in Dubai during Diwali, causing temporary shortage in smaller denominations