خلیج اردو
دبئی: یوٹیوب نے مصنوعی ذہانت سے بنائی گئی جعلی ویڈیوز اور ڈیپ فیک مواد کے پھیلاؤ پر قابو پانے کے لیے ایک نیا فیچر متعارف کرا دیا ہے۔ ’لائکنس ڈیٹیکشن‘ کے نام سے یہ فیچر یوٹیوب پارٹنر پروگرام میں شامل منتخب تخلیق کاروں کے لیے جاری کیا گیا ہے۔
یوٹیوب کے مطابق، اس فیچر کا مقصد تخلیق کاروں کے چہرے یا آواز کے غلط استعمال کو روکنا ہے، جو حالیہ برسوں میں ایک سنگین مسئلہ بن چکا ہے۔ کئی معروف یوٹیوبرز نے شکایت کی تھی کہ ان کی آواز یا چہرے کو مصنوعی ذہانت کے ذریعے کلون کر کے جعلی مصنوعات کی تشہیر یا غلط معلومات پھیلانے کے لیے استعمال کیا گیا۔
ایک نمایاں واقعے میں ایک ہارڈ ویئر کمپنی نے ایک معروف یوٹیوبر کی نقل شدہ آواز کو بغیر اجازت اپنے اشتہارات میں استعمال کیا۔ نیا فیچر تخلیق کاروں کو ایسے غیر مجاز استعمال کی نشاندہی اور کارروائی کرنے کا اختیار دیتا ہے، تاکہ وہ اپنے مواد پر کنٹرول برقرار رکھ سکیں۔
یوٹیوب کا کہنا ہے کہ یہ قدم تخلیق کاروں کی شناخت اور تخلیقی حقوق کے تحفظ کی جانب ایک اہم پیش رفت ہے، جو ڈیجیٹل دنیا میں مصنوعی ذہانت کے بڑھتے ہوئے اثرات کے تناظر میں انتہائی ضروری ہے۔
